TF Foundation mitabang sa mga hilit nga barangay sa Bohol

CEBU, Philippines - Mga hulagway kuha nila ni CAHMS ALLEGO ug BEN MARCOJOS

Naabot sa relief operation sa The Freeman Foundation ang mga hilit nga mga dapit nga naigo sa linog sa probinsya sa Bohol agi og pagduyog ug matabangan gikan sa kalisod ang mga biktima didto.

Una niini, si TF general manager Melandro “Bhoy” Mendoza ang nangulo sa three-man team sa pagpahigayon og ocular inspection ngadto sa lungsod sa Tubigon ug Calape sa probinsiya sa Bohol.

Sa ilang assessment na-identify nila ang tulo ka mga barangay nga maoy i-sentro sa pagpanghatag og mga relief goods. Ang ubang mga lugar sa Bohol ang nahatagan na og mga hinabang gikan sa nagkalain-laing grupo sa non-government organization (NGO) sa Cebu.

Sa ikaduhang adlaw, gisugdan sa alas 4:00 sa kaadlawon sa mga volunteers sa The Freeman Foundation ang pagpang apud-apod sa mga sinakong relief goods aron i-ship kini ngadto sa lungsod sa Tubigon gikan sa Cebu.

Pag-abot ngadto sa Tubigon ang miyembro ug volunteers sa The Freeman Foundation gibahin sa duha ka team. Ang unang team maoy gisangonan sa paghatud og hinabang ngadto sa pito ka mga sitio sa barangay Tan-awan usa sa mga bukirang barangay sa Tubigon.

Mikabat ngadto sa 226 packs sa relief goods ang gipang-apod-apod ngadto sa mga residente sa sitio Bunga, Macapan, Bagtic, Centro, Mahayahay, Pacencia ug Bohong. Gawas sa mga food packs, 160 ka baldeng mga biskwet ang gipang-apod-apod ngadto sa 160 ka mga pamilya una pa milahos ang team ngadto sa Sagbayan ug Clarin.

Ang ikaduhang team miadto sa isla sa Pangganan sa Calape diin ang mga residente sa duha ka mga barangay naghuwat og relief operation.

Apan dili sayon ang pagdiskarga sa mga sinakong relief goods kay gipas-an pa nila kini ngadto sa pikas tampi sa tulay nga naguba.  Ang maong tulay nagkonektar sa isla ug sa mainland.

Ang team nagpasalamat sa mga residente sa lugar nga mitabang kanila sa paghakot sa relief goods. Nasuta nga bisan sa kadaghan na sa mga nag abot-abot nga mga hinabang gikan sa malumong kasing-kasing, duna pa gihapoy mga barangay sa Bohol nga wala makatilaw niini.

Usa sa mga dakong problemang nasinati sa mga tawo sa Bohol mao ang kakuhaan og limpyong supply sa tubig. Ang mga poso ug tubod ingon man mga deep well sagol na lapok maong peligro nang imnon sa mga tawo. Mikabat ngadto sa 155 ka packs nga relief goods ang gipang-apod-apod ngadto sa barangay Lawis ug 55 ka packs sa relief goods ngadto sa barangay Look.

Ang ikaduhang team misaka kini ngadto sa barangay Binogawan diin giapod-apod nila ang nahibiling 170 ka packs nga relief goods ngadto sa 120 ka mga pamilya. Samtang ang 50 ka packs didto kini giapod-apod sa team sa sitio Cantabon.  (BANAT NEWS)