P300 mil danyos sa sunog sa eskuylahan
CEBU, Philippines - Mikabat og P300 mil ang kantidad sa mga butang ug tibuok lawak sa Balirong National High School sa barangay Balirong, dakbayan sa Naga nga nasunog sa miaging hapon.
Si SFO1 Ruseller Generalao, imbistigador sa Naga Fire Station miingon nga ang nasunog mao ang lawak sa MAPEH (Music, Arts, Physical Education and Health) nga kompleto gyud nga naugdaw.
Matud pa ni SFO1 Generalao nga ang sunog nagsugod sa usa ka appliance kansang plug nabiyaan sa mga magtutudlo o kaha estudyante nga wala maibot gikan sa outlet human sa usa ka brown out nga nahitabo sa maong lugar nianang sayo pa sa kahapunon.
Midugang siya nga dihang misiga na ang suga, mi-spark ang plug ug tungod kay daghan mang papel sa sulod sa kuwarto, dali kaayo kining midakop sa kayo nga maoy sinugdanan sa sunog.
Miingon siya nga nadawat nila ang alarma pasado alas 3:00 na sa hapon ug ang kapitan sa barangay Balirong maoy nagpahibalo kanila.
Gisulayan unta sa mga silingan ang pagpalong sa kayo apan naglisud sila kay dali kaayo nga mikatap ang kayo sa tibook lawak.
Wala pa usab madeterminar ni Generalao kun unsang matang sa appliance ang hinungdan sa maong sunog kay padayon pa ang imbistigasyon nga ilang gihimo.
Lakip nga naugdaw mao ang mga libro, DVD set, papel, electric fan ug mga plastic nga lingkoranan.
Napalong ang kayo sa kabomberohan pasado alas 4:00 na sa hapon apan naabo na ang tanang materyales niini.
Matud pa ni Generalao nga kasagarang sunog magsukad sa appliance nga dili matangtang sa outlet inig-brownout.
Kay inigsiga og balik sa suga kusog kaayo ang kuryente niini hinungdan nga inig-spark mosilaob ang kayo ilabi na kun may sunogonong mga butang sa palibot niini sama sa mga papel ug uban pa.
Giisa sa 2nd alarm ang maong sunog ug mitubag sa alarma ang mga estasyon sa Minglanila, Don Andres Soriano, Cemex Fire Brigade ug sa Atlas Copper Brigade.
Gibana-bana nga mokabat sa P300 mil ang danyos sa maong sunog ug walay naangol niini o kaha namatay. (BANAT NEWS)
- Latest
