Mga estudyante klasehan og Sabado

CEBU, Philippines - Gitumbok sa mga kadagkuan sa Department of Education sa syudad sa Mandaue  nga ang mga tinun-an sa publikong tulunghaan sa elementarya ug high school hayan may klase sa adlaw nga Sabado.

Kini agi og pakang   o  ilis sa taas nga semestral break tungod sa nasinating linog  nga  may  7.2  nga  magnitude niadtong Oktubre 15 ning tuiga dinhi sa Sugbo ug Bohol ug daghang  mga  eskuylahan  ang  nangaguba.

Sumala pa ni Dr. Benjamin Tiongson, ang administrative officer sa DepEd Mandaue city nga nakadawat sila og kamanduan gikan sa Provincial DepEd office nga may  gipapilian kanila nga  mga   option aron makompleto ang gidaghanon sa klase sa tibuok school year. Kini  tungod kay may pipila ka mga karaan nga mga school building ang naguba sa linog   nga nagkinahanglan nga ayohon.

Usa sa option mao ang magklase ang mga tinun-an sa adlaw nga Sabado aron  mabawi ang mga adlaw nga  way  klase  human  sa linog.

Laing kapilian mao ang paggamit sa classroom sa duha ka klase, usa sa buntagon samtang ang usa haponon.

Iyang gitataw nga kadtong walay nasinatiang grabing kadaut, mahimo rang mobalik sa normal nga klase ang  maong mga tulunghaan.

Apan gitataw niini nga posibling madugangan  pa ang mga adlaw nga walay klase tungod sa nagpadayon nga  mga aftershocks nga nasinati gihapon sa lalawigan sa Sugbo ug sa Bohol.  (BANAT NEWS)