6 ka simbahang Katoliko sa Sugbo gilumpag sa linog

CEBU, Philippines - Gipahibawo sa buhatan sa bise gobernador sa lalawigan sa Sugbo nga ang gidaghanon sa naguba nga heritage sites sa probinsiya sa 7.2 magnitude nga linog niadtong Oktubre 15 ning tuiga mikabat  na og unom.

Sigun pa ni Vice Gov. Agnes Magpale nga ang nahisgutang mga heritage site sa probinsiya nga grabing  pagkagubaa sa linog, gilangkoban sa simbahan sa Dalaguete, Dumanjug, Samboan, Boljoon, Sibonga ug Argao.

Matud pa ni Magpale nga ang pagpaayo sa maong mga simbahan nagkinahanglan og dakong pundo hinungdan nga nagkinahanglan ang kagamhanan sa lalawigan og tabang gikan sa mga pribadong institusyon.

Ang bise gobernador miingon nga ang mga lokal nga opisyal sa nahisgutang mga simbahan mahimong makakolekta og dugang hinabang gikan sa mga pribadong indibidwal  sa ilang lugar aron dali kining mapatukod ug mapaayo.

Midugang  si  Magpale  nga kun ang kagamhanan sa lalawigan ug mga LGUs makatigum na og pundo mananghid pa kini kang Msgr. Carlito Puno ang gitahasan sa Archdiocese sa pagpaayo sa mga nagubang simbahan dinhi sa lalawigan sa Sugbo. (BANAT NEWS)