CEBU, Philippines - Gikabalak-an karon nga magkaguliyang na usab ang mga han-ay sa mga opisyal sa Bureau of Customs subay sa nigawas nga report sa kaulohan nga hatagan og tag-as nga posisyon ang mga retiradong mga military officials ngadto sa tanang mga district offices sa Buro sa Adwana lukop nasud.
Si Cebu Customs District Collector Atty. Paul Alcazaren nitug-an nga nakadungog siya og susamang taho labot niini apan wala kini nikompirmar ang kamatinud-anon sa maong report.
Apan gitataw ni Alcazaren nga wala siya mabalaka sa nahisgutang taho sanglit andam man siya nga modawat sa kamanduan sa iyang labaw.
Matud pa ni Alcazaren nga andam usab nga mobakante sa iyang posisyon isip district collector sa BOC sa Sugbo kun mao kini ang kagustohan sa iyang labaw.
Nasayran nga nagkaguliyang ang Bureau of Customs human ang mga port colectors nga nagranggo og Collector 4 pataas gipangtangtang sa posisyon nga gihuptan ug gibutang sa floating status ubos sa buhatan sa Department of Finance.
Kini aron matuman ang gitinguha sa administrasyong Aquino nga kalimpyohan ang maong buhatan batok sa mga kurakot nga mga kawani ug opisyal sa gobiyerno. (Chester Abadilla/EIM)
Babayeng ‘gunrunner’ nadakpan sa CIDG7
Nasikop sa mga operatiba sa Criminal Investigation and Detection (CIDG) 7 ang usa ka babaye nga giingong usa ka gunrunner sa barangay Poblacion sa dakbayan sa Danao niadtong Miyerkules sa hapon.
Ang suspetsado naila nga si Wilma Beduya, 43, molupyo sa barangay Poblacion sa dakbayan sa Danao.
Nakuha gikan sa iyang balay ang duha ka mga KG9 nga submachine pistols, tulo ka magazines, ug kapin sa 500 ka mga bala sa kalibre .45 ug .9mm sulod sa metal locker sa balay ni Beduya.
Si Supt. Fermin Armendares sa CIDG-7 miingon nga si Beduya dugay na nga namaligya og armas.
“Siya’y tigbaligya sa mga armas nga nahuman na og himo. Kadtong na-recover namo nga armas gikan niya, salin na lang ‘to sa iyang nabaligya pag-eleksyon,†matud ni Armendares.
Matud pa nga ang suspetsado wholesaler sa mga kalibre .45 nga pistola, .38 nga revolver ug KG9 pistol ug matud pa niini nga ang KG9 mohalin og P10 mil hangtod sa P15 mil kada usa.
Miingon si Armendares nga nakit-an pa nila ang usa ka listahan sa mga purchase orders sa balay sa suspetsado. Apan ang suspetsado mihimakak nga iya ang maong balay kay iyang maguwang nga lalaki ang tag-iya niini.
Ang pagkasikop sa suspek pinasikad sa search warrant gikan ni Executive Judge Teresita Galanida sa RTC Branch 56, misuway pa og lugnot ang suspek apan wala na kini makapalag dihang giposasan. (BANAT NEWS)