Namana napalgang patay

CEBU, Philippines - Napalgan na lang nga naglutaw sa dagat ug wala nay kinabuhi ang usa ka mananagat sa barangay Poblacion sa lungsod sa Pinamungajan sa alas 7:00 sa buntag kagahapong adlawa.

Naila kini nga si Joselito Quijon Abong, 47, molupyo sa sitio Targitan sa barangay Pandacan sa lungsod sa Pinamungajan.

Matud pa ni PO1 Ronelo Lawas nga nahinabi sa Banat News nga usa ka Alo Udang ang mi-report sa ilang buhatan human gisultihan sa usa ka Nori Donan nga duna siya’y napalgang patay nga lawas nga naglutaw sa barangay Poblacion. Misuway pa og hatag og Cardio Pulmonary Resuscitation (CPR) ang Municipal Health Officer sa lungsod sa Pinamungajan si Dr. Shella Faciol apan patay na kini.

Ang asawa sa namatay nga si Damasa miingon sa kapolisan nga alas 11:00 sa miaging gabii namana og isda ang iyang bana. Gituohan nga nalumos si Abong. (BANAT NEWS)