CCMC wa putli’g kuryente – Cruz

CEBU, Philippines - Gihimakak sa opisyal sa Bureau of Fire Protection (BFP) Regional Office 7 ang taho nga putlan og kuryente ang Cebu City Memorial Medical Center nga naa karon sa ilang edipisyo.

Si Sr. Insp. Karlo Benito Cruz, chief legal officer sa BFP miingon  nga dili tinuod ang maong taho.

Mibahad  siya  nga   ibalhin  sa BFP ang linya sa kuryenti  niini ngadto sa kaugalingong metro sa CCMC.

“Unfair sa mga bombero yong mga isyu na pinutolan ng kuryenti ang CCMC, kung nakikita nyo naman may kuryenti pa sila, at ating pina-facilitate na ang kuryenti nila ay ma-transfer sa kanilang metro,” matud pa ni Cruz.

Sumala pa ni Cruz nga ang BFP usa ka national agency ug ang CCMC lokal nga ahensya ug dili mahimo nga sila’y   mag-abaga sa bayranan  sa konsumo  sa kuryenti  niini.

Miingon si Cruz nga  niining buwan sa Oktubre sila lang  una  ang  mibayad  sa konsumo  sa  kuryente  sa tambalanan  sa kagamhanan   tungod sa nasinati  sa  maong  hospital human sa linog.

Nabalaka ang BFP matud pa ni Cruz nga kun padayon nilang abagahon ang  bayranan  sa kuryenti sa hospital basin dili motugot  ang - Commission on Audit (COA) niini.

Midugang  siya  nga  kun  ingon  niini    ang  kahimtang   may tulobagon pa  nga personal si BFP Regional Director  Sr. Insp.  Ma. Luisa C. Hadjula.

Matud pa ni Cruz nga gikaguol nila ang mga taho nga migawas apan iyang gihingusgan nga dili sila mohawa sa maong edipisyo tungod kay sukad pa sa tuig 1971 diha  na  sila  sa   maong lugar.

Midugang si Cruz nga may claim of ownership na ang BFP sa maong  dapit sukad pa niadtong 1980 dihang  gigamit pa kini sa kanhi Philippine Constabulary-Integrated National Police (PC-INP).

Matud pa ni Cruz nga ang nahitabo nga panagbangi sa BFP ug sa kagamhanang lokal sa dakbayan sa Sugbo nakapa-ubos sa morale sa mga bombero.

Sumala pa niini nga mitabang ang mga bombero sa pag-rescue sa mga nabiktima sa linog apan wala na sila’y barracks nga mabalikan tungod kay gigamit na man sa mga pasyenti sa CCMC.

Apan miingon si Cruz nga misugot na sila nga gamiton sa CCMC ang edipisyo sa BFP  unya gipadad-an na man hinoon sila  og suwat  ni   Mayor  Michael  Rama nga nagmando kanila sa pagbalhin  sa laing  lugar.

Samtang  ang  ilang  nasudnon  nga  buhatan  mimando  usab  nga  magpabilin sila  sa maong  puwesto. (BANAT NEWS)