2 giparelaha’g luba angol

CEBU, Philippines - Samdan  ang duha ka lalaki  human  pareglahi  og  dunggab didto  sa sitio  Datag barangay  Maribago, dakbayan  sa Lapulapu  sa miaging  gabii.

Ang mga biktima mao sila si Felix Agosto, 20, diver sa yellow submarine, nga nagpuyo  sa maong dapit ug Wilfredo Lupiano, 24, nga taga barangay Gun-ob sa maong dakbayan.

Ang mga suspetsado nga miluba  sa mga biktima mao sila si Wendel Amora, 20, ug kuyog niini ang  bayong-bayong  nga 16 anyos  nga silingan  ra  ni  Amora.

Matud pa ni PO2 Samuel Evalle sa kapolisan sa Presinto 2 sa Lapulapu City Police Office (LLCPO) nga nahinabi sa Banat News  nga gikan pa ang mga  biktima  nga  namisita  sa ilang  mga  uyab sa maong dapit.

Sa pagpamauli   subay  sa dalan  paingon  sa ilang  balay  kalit  lang  nga  mitumaw  ang mga  suspetsado  ug  sa  walay igong hinungdan  gipanunggab   sila niini  pinaagi  sa Batangas Knife.

Ang mga biktima nga nagkabuang sa pagpanagang  nasugamak  gayud sa  daghang samad sa  lawas.

Nangayo  sila  og  panabang  sa  mga  molupyo  sa maong  lugar.

Dihang  milihok  ang  katawhan  sa  maong  dapit  naglumba sa pagpanagan   ang  mga  suspetsado pahilayo  sa maong  lugar.

Gihatud  dayon  ang  mga  biktima  ngadto  sa Lapulapu  City  Hospital,  apan   gumikan  sa kadaghan  nilang  samad  gibalhin  sila ngadto  sa  Vicente  Sotto Memorial Medical Center sa dakbayan  sa Sugbo.

Padayon  pang  gipangita sa kapolisan  ang  mga  suspetsado  aron  papanubagon  sa ilang  mga  sala. (BANAT NEWS)