Imahen sa Birhen sa Alcantara milingi gyud

CEBU, Philippines - Dili mokomento si Fr. Peter Monteron, parish priest sa St. Augustine Parish sa Poblacion, Alcantara kabahin sa giingong paglingi sa ulo sa imahen sa Our Lady of the Holy Rosary kung kini usa ka “milagro.”

Sa interview sa Banat News, nagdumili siya paghatag og personal nga panahom apan iyang gidasunan ang pamahayag ni Cebu Archbishop Jose Palma nga nagkanayon nga “maybe it’s an invitation to prayer.”

Kagahapon sa buntag, si Palma ug Monteron nagkaestorya  bahin sa giingong paglingi sa Mahal nga Birhen ngadto sa direksyon sa Bohol nga nasentro sa 7.2 magnitude nga linog niadtong Oktubre 15.  Matud niya nga giingnan siya ni Palma nga “let it be…we can’t understand, there might be a scientific explanation to that…we can’t interpret, why it is happening.”

Sa dihang gipangutana kun nag-atubang ba gyud kaniadto ang nawong sa imahen (karong naglingi na sa tuo) dili siya makatubag apan iyang gisugyot nga angay pangutan-an ang ilang lay minister nga si Eddie Irojo.

Matod niya si  Irojo ang nagkuha sa imahen gikan sa sudlanan ug ang nagbutang  niini sa atubangan sa altar. Apan giingnan siya ni Irojo nga ang ulo sa birhen nag-atubang gyud kaniadto ug wala molingi sa tuo.

 â€œMatud ni Archbishop Palma pwedi ra ibalik ang imahen sa iyang sudlanan pero makaana unya daw ang mga tawo nga gitagoan, so he advised nga ibutang lang kini sa atubangan sa altar pero sa kilid dapit,” matod niya, adding people from neighboring municipalities and devotees continued to visit their church to pray and took picture.

Niadtong Oktubre 23, 2013, nasaksihan sa Banat News ang pagdagsa sa gatosang mga deboto nga nagpanon sa St. Augustine Parish diin mahimutang ang imahen human mogawas ang balita.

Tinuod gyud nga milingi ang birhen sa lungsod sa Alcantara matud pa sa kanhi Presidente sa Pastoral Council nga si Edgar Irojo kinsa mao gyu’y midala sa birhen ngadto sa Alcantara gikan sa nagkulit niini sa dalan A.Lopez sa Cebu City ug padung sa ilang simbahan  niadtong Agosto 19, 2004.

Matud pa niya nga maibot-ibot gyud ang ulo ug mga kamot sa maong imahen ug gisulod lang kini og urna sulod sa sakristiya sa parokya ni San Agustin sa lungsod sa Alcantara ug gipagawas lang kini sa sayong bahin niining buwana sanglit ang Oktubre kay buwan sa rosaryo.

Pagkabuntag niadtong Oktubre petsa 23 nabantayan sa usa sa ilang mga sakristan nga milingi ang imahen maong daling gipahibalo sa bata ang presidente sa pastoral council nga si Balgamae Labusao bahin sa maong hitabo.

Matud pa nga 45 degrees ang pagtuyok patuo sa ulo sa imahen apan walay nanghilabot niini ni bisan kinsang sakop sa simbahan sa nanglabay’ng mga adlaw ug ilaha unta kining gisuwayan pagpabalik og tuyok apan dili na gyud kini molihok.

Hangtod kagahapong adlawa padayon ang mga tawo sa pagbisita sa simbahan nga abli sugod sa alas 5:00 sa buntag ug mosira na sa alas-10 sa gabii matag adlaw.

Miingon si Irojo nga siya mismo dili katuhop nga dunay milagro apan sa iyang obserbasyon dako gyud ang paglingi sa birhen. (BANAT NEWS)