Upat ka senior citizen nga ‘goons’ nadakpan

CEBU, Philippines - Upat ka mga maisip nang mga “senior citizens” nga gikatahapang goons nga gi-hire og politiko  ang gidakop human giingong gisulong ang polling precinct sa Marigondon Elementary School sa dakbayan sa Lapulapu alas-7 pasado ang takna sa miaging gabii atol usab sa nagpadayon nga pag-ihap sa boto sa mga sakop sa board of canvassers. 

Si PO3 Arnold Damasco sa kapolisan sa Presinto 4 sa Lapulapu City Police Office (LLCPO) miila sa mga nadakpan nga mao sila si Alejandro Serna Toyogon, 60, taga Tejero sa dakbayan sa Sugbo, Dionesio Osabel dela Cruz, 69, nga taga Alaska, Mambaling sa dakbayan sa Sugbo, Eleuterio Otadora Tampus, 76,  taga San Roque, dakbayan sa Sugbo ug Rico Bonita Salinas,  taga Alaska- Mambaling sa  Cebu City.

Dihang gikomprontase, nasuta nga armado sila  ug nakuhaan og mga kalibre 38 rebolber nga may mga bala apan walay legal nga dokumento nga nagtugot kanilang makadala og armas. Kasong kalapasan sa illegal possession of firearms ug kalapasan sa Comelec gun ban ang ipasaka kanila. (BANAT NEWS)