CEBU, Philippines - Temporaryo nga gibalik pagpatuman sa Land Transportation Office (LTO) dinhi sa Central Visayas ang pag-require sa mga mokuha’g driver’s license nga magpa-drug test usa sila aron mahibaw-an kun tigamitan ba sila’g illegal nga drugas, ilabi na ang shabu.
Ang hukom sa kadagkoan sa LTO nga pakuhaon pagbalik og drug test kadtong mo-apply og bag-ong lisensya o kaha magpa-renew sa expire nila nga lisensya nagumikan sa kamandoan ni Regional Trial Court (RTC)-Branch 59 Judge Hermes Montero sa Toledo.
Matud ni Montero nga angayang ipatuman ang pag-require pagbalik sa drug test samtang husayon pa ang kaso nga gipasaka sa usa ka Dulcisimo Tuldanes, usa ka tag-iya og drug testing center.
Si LTO-7 Acting Regional Director Arnel Tancinco mipasabot nga ang ilang ulohang buhatan maoy naghatag og kamandoan nga ipatuman nila pagbalik ang pagpakuha og drug test sa mga drayber.
Daghang mga drayber nga mi-apply og lisensya nangreklamo tungod kay giisip nila kini nga dugang gastohan, samtang dunay uban nga miingon nga sayon ra nga makalikay ang mga drayber aron dili sila mapositibo sa drug test.
Dunay miingon nga dili mahibaw-an ang mga tigamitan og gidiling matang sa drugas pinaagi lang sa pag-examine sa ihi kun mohunong sila paggamit tulo ka adlaw sa dayon nila nga pagpa-drug test.
Ang epektibo nga paagi sa pag-ila kinsa kadtong mga tigamitan og gidili nga matang sa drugas mao ang pag-drug test kanila pinaagi sa pag-examine sa ilang dugo.
Dunay mga tabi-tabi nga ang ubang mga molukat og lisensya magsugo ra gani og tawo nga maoy ilang pakuhaan og sample sa ihi aron himoan og drug testing.
Ang pamaagi sa LTO mao nga kadtong mga lisensya sa mga drayber nga mapositibo sa drug test dili na ihatag kanila.
Sa laing bahin, gitataw sa LTO director nga walay pag-usbaw sa bayranan sa drug test sa mga drayber.
Ang pamahayag ni Tancinco giluwatan tungod kay dunay report sa mantalaan nga nagbutyag nga P500 ang kantidad sa drug test. Matud ni Tancinco nga nagpabiling P300 gihapon ang bayad sa drug test sa matag drayber. (BANAT NEWS)