Piniliay sa Lapulapu malampuson

CEBU, Philippines - Gihulagway  sa kapolisan  sa dakbayan  sa Lapulapu  nga malampuson  ug  malinawon  ang  piniliay  sa barangay  sa maong  dakbayan  sa  miaging  Lunes.

 Si Lapulapu City Police Office Director P/SSupt. Rey Lyndon Lawas  nagkanayon   nga  nakadawat  siya  og  taho  gikan  sa iyang  mga  operatiba  sa  Olango island ug  sa mainland Lapulapu  nga wala  sila  makasugat  og  mga  kasamok   sa tibuok  adlaw  sa piniliay.

Hinuon  nakasikop  sila  og  upat  ka tawo didto  sa barangay  Marigondon gumikan  sa pagtangkil  og  armas  de fuego  nga way  lisensya. Gumikan niini mapasalamaton si SSupt. Lawas sa tanang augmentation sa Phil. Air Force, Phil. Navy, Phil. Coast Guard ug uban pang special units nga miabag sa kapolisan sa pagmentenar sa kahapsay ug kalinaw atol sa piniliay.

Nalipay usab si Lawas sa kahapsay sa piniliay sa Brgy. Punta Engano nga maoy ilang gitutokan og maayo gumikan sa kainit sa mga kandidato  sukad pa sa milabay’ng piniliay niadtong tuig 2010.

Lakip sa mga dapit nga ilang gitutokan mao ang barangay Agus, Pajo, Pusok, Ibo, Pangan-an ug Brgy. Tung-asan .

Ang  maong  mga  barangay  gikandidatohan  sa  pagka-kapitan   nga mga suod nga higala nila ni Lapulapu City Mayor Paz Radaza ug kanhi Cong. Arturo Boy Radaza. (BANAT NEWS)