CEBU, Philippines - Gipasanginlan nga nanion sa iyang armas de fuego ang usa sa mga kaliwat sa mayor sa siyudad sa Danao human sa piliniay sa miaging Lunes.
Si PO3 Arnold Labini miila sa biktima nga mao si Tomas Rose Batucan, 32 , lumad nga taga Poblacion ,syudad sa Danao ug kandidato sa pagka-barangay konsehal sa maong barangay.
Samtang ang suspetsado mao si Edwardito Durano alyas Apro, hingkod ug lumad nga taga Tabuc ug kaliwat usab sa mayor sa maong siyudad .
Sigun pa sa pasiunang imbestigasyon sa kapolisan sa Danao nasuta nga ang suspetsado giingong masuk-anong migawas sa Danao Central School nga nahimutang sa PJ Almendras Street, sa Poblacion, Danao sa alas 6:20 sa sayong gabii.
Unya sa wala matinong rason nakiglalis kini ngadto sa biktima hangtud nga miinit pag-ayo ang maong lalis.
Ang suspetsado kinsa giingong nahutdan sa katarungan milanit sa iyang .38 kalibre nga revolver ug gition ngadto sa biktima.
Maayo na lang kay miabot ang mga polis sa maong tulunghaan ug daling nakadiskita sa maong kagubot.
Apan dihang miduol ang mga polis daling miikyas ang suspetsado palayo sa maong lugar.
Ang biktima mipa-blotter usab sa maong insidente didto sa police station aron mapasakaan og kaso nga may labot sa paglapas sa Republic Act 8294 nga mao ang Comelec Gun Ban ug pagpanion og armas. (BANAT NEWS)