‘Goons’ sa Compostela gihimakak

CEBU, Philippines - Mayor sa lungsod sa Compostela gipasanginlang mipadala og napulo ka mga armadong lalaki sakay sa usa ka Isuzu D-Max pickup sa barangay Panangban sa lungsod sa Compostela sa miaging gabii. Matud pa nga sa napulo, unom niini mga sundalo nga nadestino sa 78th Infantry Battalion nga gikatahong maoy gigamit aron sa pagpanghulga sa mga residente ug pagpamalit og boto.

Usa ka concerned citizen mipasangil nga nakita sa administrasyon nga lisod  pildihon ang incumbent nga kapitan sa baryo nga dili kaalyado sa mayor.

Apan si Mayor Joel Quiño nga nahinabi sa The Freeman/Banat News mihimakak sa maong pasangil ug miingon nga gialihan og lubi sa mga supporters ni kapitan Bernabe Castro ang iyang Isuzu D-Max nga may plate number YGU 475 niadtong gabhiona.

Si Quiño miingon nga gihulaman sa iyang ig-agaw nga si Salde Pareja ang iyang sakyanan padulong sa maong lugar tungod kay may importante kini nga tuyo apan mitawag na lang kaniya si Pareja sa alas 8:00 sa gabii nga gialihan sila.

Human madawat sa mayor ang maong tawag iya sab nga gipahibalo ang kapolisan sa maong lungsod aron mangayo og tabang.

“Nanawag na siya (Pareja) nako kay dili na kuno sila kagawas sa lugar kay giharangan na kuno sila og lubi nga gitumba,” matud pa Quiño. Miingon si Quiño nga alas 10:00 na sa gabii na nakauli si Pareja dala ang iyang sakyanan.

Si Insp. Mia Rose Burlat ang hepe sa Compostela nga nahinabi sa The Freeman/Banat News miklaro nga wala’y mga armadong tawo nga ilang nasigpatan apan nakit-an nila ang usa ka Isuzu D-Max nga gibiyaan diha sa dalan.

Miingon usab si Burlat nga gitawagan siya sa mayor aron sa pagsusi sa maong lugar. “Wala ko’y idea kinsa’y gapadala basta anang armado kay ang mayor na mismo ang mitawag sa station nga ipaadto ang lugar,” sumala pa ni Burlat. Matud pa ni Burlat nga nagpadala siya og unom ka mga polis ug usa ka team sa Special Weapons and Tactics. “Basin ang nahitabo kay na-overreact ra pud sa mga tawo pagtuo nga naa ang sakyanan (sa mayor),” matud ni Burlat. Tungod sa maong insidente gipadad-an na ni Burlat og lima ka polis ang maong lugar aron masiguro ang kahusay ug kalinaw  sa piniliay karong adlawa.

“Dunay posibilidad nga mapun-an pa na kay duna pa may coming nga personnel (mga polis),” sumala pa ni Burlat. (BANAT NEWS)