Tiguwang napaig

CEBU, Philippines - Napaig ang usa ka lalaki sa sunog nga miigo sa sitio Inuburan, barangay Tinaan sa dakbayan sa Naga sa alas 6:20 sa miaging gabii.

Ang napaig naila nga si Joe Enave, 60 anyos  kapin, molupyo  sa sitio Inuburan.

Matud  pa ni SFO1 Ruseller T. Generalao sa Naga City Fire Station nga nahinabi sa Banat News nga napalgan na lang nila ang patay nga lawas sa biktima nga napaig human sa sunog.

Basi sa imbistigayon ni SFO1 Generalao nasuta  nga ang kayo didto nagsugod sa kusina sa balay  sa biktima ug dali kaayong mikatap ang kayo.

Miingon si Generalao nga ang biktima  may piang sa  tiil kay natagak kini sa lubi sa miaging semana ug maglisod og lakaw.

Nagtuo ang mga silingan sa biktima nga nagluto kini  sa kusina  ug nakalimtan  pagpawong  ang  kayo  samtang  nakatulog  sa lantay sa ilang terrace.

Matup pa ni SFO1 Generalao nga walay sinyales nga misulay og eskapo sa kayo ang  biktima.

Gituohan  nga  nalumos kini sa aso samtang naghigda sa lantay sa terrace hinungdan  nga wala  na  makadagan aron maluwas  sa kayo.

“Kon gusto pa niyang mo-eskapo maka-eskapo, basin natulog,” matud pa ni SFO1 Generalao.

Ang sunog sumala pa sa mga silingan nagsugod sa mga alas 6:20 sa miaging gabii.

Wala dayon  makatawag ang nasunogan sa mga  bombero, gani usa ka Engr. Luisito nga safety officer sa usa sa mga kompanya sa Naga   mao  nay  nakapahibalo sa buhatan  sa bombero bahin  sa maong  sunog nianang alas 6:30 ang  takna  sa gabii.

Mirespondi ang kabomberohan sumala pa ni SFO1 Generalao sa  alas 6:32 na sa gabii ug nakontrolar nila ang kayo   human sa tulo  ka minuto. (Bryner Diaz/WC)

Wa molukat  og building permit  gikasohan

Ang Cebu City Legal Office mipasaka og kaso’ng kriminal batok sa tag-iya’g apartment diha sa Barangay Guadalupe kay nasayran nga wala diay siya mokuha og building permit.

Matud ni City Legal Officer Jerone Castillo nga iyang gipasakaan og kaso si Kaiser Tan tungod kay nakalapas siya sa lagda nga gilatid sa National Building Code of the Philippines.

Si Castillo miingon nga si Tan mitukod og 13 ka units nga rowhouses  sa dalan Alaura, sakop sa Barangay Guadalupe apan wala siya molukat og building permit.

Ang balaud naglatid nga bisan gani ang mga ahensya sa kagamhanan kinahanglang mokuha usab og building permit gikan sa Office of the Building Officials (OBO) sa dili pa sila motukod.

Matud ni City Legal Officer Castillo nga ang kaso nga gipasaka niya ni Tan atua na nasang-at sa Cebu City Prosecutor’s Office ug hayan patubagon na si Tan  pinaagi  sa pagsumiter sa iyang counter-affidavit.

Samtang nasayran usab nga hapit na  pasakaan og kaso sa City Legal Office ang duha ka tag-iya sa gitukod nga balay duol sa Marco Polo Hotel kay wala gihapon mokuha og building permit sa pagtukod sa ilang dagku nga panimalay.

Si OBO chief Kenneth Carmelita Enriquez miingon nga ang pagkuha og building permit gituyo aron nga masuta sa mga structural ug civil engineers kun tukma ba ang ilang plano sa pagtukod og building aron masiguro ang iyang kaluwas. –/WC (BANAT NEWS)