Kandidato sa pagka-kapitan sa Barangay Opao gipadad-an og death threat pinaagi sa koreyo

CEBU, Philippines - Usa ka kandidato sa pagka-barangay kapitan sa barangay Opao sa dakbayan sa Mandaue ang buot nga mapaubos sa Comelec control ang ilang dapit sa panahon sa piniliay karong Oktubre 28, 2013.

Ang miduso sa maong petisyon mao si Edgar Prada nga kandidato nga barangay kapitan sa nahisgutang dapit nga maoy nagsilbing kaatbang ni incumbent barangay Kapitan Barceliza Icalina. Si Prada nga nahinabi sa Banat News miingon nga nakahukom siya sa pagduso sa maong petisyon ngadto sa buhatan sa Comelec sa maong dakbayan human usab siya makadawat og hulga niadtong Martes.

Matud pa niya nga ang hulga gipaagi sa gipadala nga package nga gipaagi sa LBC nga gi-address ngadto sa iyang asawa nga nag-ingon nga nag-condolence ngadto kaniya.

Kauban sa maong note ang kandila ug “mourning pin” o loto nga nakapabalaka kaayo kaniya ug sa sakop sa iyang pamilya niining panahona.

Gumikan sa mao niyang kabalaka maoy iyang tinguha karong panahona nga ang Comelec modestino unta kaniya og usa ka polis nga maoy mobantay kaniya.

Apan si Atty. Ann Fleur Gujilde nga maoy Comelec election officer sa maong dakbayan nga nahinabi sa Banat News miingon nga iyang iduso sa kapolisan ang reklamo ni Prada alang sa paghimo og imbestigasyon.

Matud pa ni Gujilde nga dili madali ang pagpaubos sa Comelec control sa usa ka lugar panahon sa piniliay tungod kay nagkinahanglan man kini nga masusi sa  kapolisan.

Si Gujilde miingon nga ang petisyon ni  Prada  iyang ipadala ngadto sa ilang rehiyonal nga buhatan nga mao usab ang mohimo og tukmang aksyon.

Gipadayag ni Gujilde nga mahimo man nga mo-hire si Prada og private security nga mobantay kaniya apan nagkinahanglan gihapon og approval sa ilang buhatan.  (BANAT NEWS)