Cordova andam na sa election sa barangay

CEBU, Philippines - Hingpit na nga nakapangandam ang kagamhanan sa Cordova alang  sa barangay election sa Oktubre 28 niining tuiga bisan pa sa nasinating linog  dili  pa dugay.

Kini ang nasayran sa Banat News kang Alvin Maghanoy nga maoy Commission on Election (Comelec)  municipal registrar   kagahapon.

Matud pa niya nga wala sila  mabalda  sa  7.2 magnitude nga linog  nga  mitay-og  sa lungsod  sa miaging  Oktubre 15. Kini tungod  kay walay  mga  kadaut sa mga tulunghaan nga maoy  ilang himoong polling precinct sa umaabot nga piniliay sa barangay.

Si Maghanoy miingon nga  sa Oktubre 17 pa niining tuiga nga nakakompleto na ang 13 ka barangay sa paghatag sa ilang cash donation nga P10,000 isip augmentation nga magamit sa ilang buhatan alang  sa election.

Gitataw niya nga ilang gitugyan sa kapolisan ang pagpatuman sa kahapsay ug kalinaw atol unya sa maong adlaw sa piniliay.

Midugang  siya  nga wala usab sila makadawat og taho nga adunay barangay  nga  gituohang  magkagubot  sa election. Si Atty. Ann Fleur Gujilde nga maoy election officer sa Comelec sa dakbayan sa Mandaue nga nahinabi sa Banat News miingon nga hingpit na usab sila nga nakapangandam sa piniliay nga umaabot.

 Matud pa niya nga nagpadayon na karon ang ilang pagsuta sa kahimtang sa mga lawak saringan sa mga publikong tulunghaan  isip polling precinct sa panahon sa piniliay.

Dugang pa niya nga ang mga binilanggo sa Mandaue City Jail lakip usab sa makabotar sa maong adlaw sanglit naghimo man usab sila og laing polling precinct  alang  kanila. (BANAT NEWS)