Konseho sa Talisay mopaimbestigar sa ‘paghimulbol’

CEBU, Philippines - Ang konseho sa dakbayan sa Talisay mopalabang og resolusyon sa sunod semana kabahin sa giingong pagpanghimulbol sa mga gi-impound nga motorsiklo nga nahimutang diha sa impounding area sa Talisay City Police Station.

Si Talisay City Councilor Danilo Caballero kinsa maoy chairman sa committee on police sa pakighinabi niini sa Banat Manobela nagkanayon nga mopahigayon siya og imbestigasyon sa pagpiho sa nahisgutang report ug posibleng ipatawag niya ang officer-in-charge sa Talisay City Police Station kabahin niini.

Matud ni Caballero nga sa sunod semana mopalabang siya og resolusyon aron masusi ang status sa mga sakyanan ilabi na ang nahisgutang mga motorsiklo kung maadto ba kini pabor sa kagamhanan sa siyudad o mauli ba kini sa mga tag-iya.

Gibutyag ni Caballero nga nahisgutan nila ni Bise Mayor Romeo Villarante kinsa maoy chairman sa City of Talisay Traffic Operation Development Authority (CT-TODA) ang kabahin sa nahisgutang report.

Matud usab ni Caballero nga kinahanglang dunay dinaliang aksiyon ang maong problema aron mahunong na kini aron usab dili mawagtangan og kredibilidad ang kapolisan sa siyudad ug mosalig kanila ang publiko.

Kahinumduman nga mga 20 ka mga motorsiklo karon ang naa diha sa impounding area kilid sa Talisay City Police Station nga hinay-hinay na sa pagkadugta tungod sa uwan ug init.

Apan ang maong mga motorsiklo hinay-hinay usab og kawagtangan og mga ‘peripheral parts’ ug gidudahang dunay nagsige og panghimulbol niini.

Si Supt. Resty Santos nagkanayon nga pag-abot niya diha nang daan ang maong mga motorsiklo ug ang uban niini paingon nang madugta.

Si Santos kinsa upat ka buwan pa lang sa iyang paglingkod isip OIC sa TCPS nagkanayon nga gikuhaan na nila og chassis ug engine numbers ang maong mga motorsiklo ug gipadala ngadto sa Land Transportation Office (LTO) aron maila ang mga tag-iya niini.

Dugang ni Santos nga sa karon kung duna silay ma-impound nga mga motorsiklo kuhaan nila og hulagway ang sakyanan lakip ang drayber niini.

Ug kung dunay mapakitang dokumento ang nangangkon niining tag-iya i-release dayon nila kini. (BANAT NEWS)