Alcazaren mibalik isip OIC collector sa BOC Cebu
CEBU, Philippines - Nahibalik sa iyang pwesto isip OIC District Collector sa Port of Cebu si Atty. Paul Alcazaren.
Kini human ibasura sa Makati Regional Trial Court ang Temporary Restraining Order (TRO) sa 17 ka mga District Collector nga naglakip sa petitioner nga si Atty. Ma. Lourdes Mangaoang.
Si Mangaoang milingkod isip OIC District Collector sa Port of Cebu human niya kuwestiyona ang pagkatudlo ni Alcazaren isip OIC District Collector sa Port of Cebu nga ubos kaniya og ranggo.
Aron malikayan ang tensiyon tali sa duha ka abogado, si BOC Commissioner Ruzzano Rufino "Ruffy" Biazon mipataliwa kanila ug mihatag og higayon ni Atty. Mangaoang nga makalingkod isip District Collector sa Sugbo.
Kini samtang nagpadayon ang 17 ka adlaw nga extention sa TRO niini.
Apan sa milabay’ng Lunes pormal nga gibasura sa korte ang TRO sa mga petitioner hinungdan nga tanang mga nagranggo og Collector V ug VI adto na idestino sa Customs Policy and Research Office (CPRO) sa buhatan sa Deparment of Finance.
Gumikan usab sa maong kalambuan si Atty. Alcazaren pormal usab nga mibalik sa iyang katungdanan isip OIC Cebu Customs District Collector sa Port of Cebu base sa kamandoan sa komisyoner.
Samtang si Atty. Alcazaren sa iyang bahin mipadayag nga igo lamang siya nagtamod sa mando sa iyang labaw ug kung adunay kausaban andam siya nga mosunod niini.
Busa gihimo ni Alcazaren kagahapon ang pagsusi sa iyang buhatan kung luwas ba kini sa publiko nga adunay transaksiyon sa BOC ug mapasalamaton kini nga base sa gihimong inspection sa mga engineer sa Cebu Port Authority (CPA) nasuta nga luwas kini alang sa publiko human sa 7.2 magnitude nga linog sa milabay’ng semana. (BANAT NEWS)
- Latest
