Menor gi-rape gidak-dakan og bato patay

CEBU, Philippines - Patay na nga napalgan ang usa ka dalagita nga gituohang gilugos unya gidunggab ug gidakdakan og bato ang ulo niini sulod sa sementeryo sa barangay Maslog sa lungsod sa Tabogon pasado ala-una sa miaging hapon.

Ang biktima naila nga 15-anyos, 4th year nga estudyante sa Doña Liling National High School.

Base sa imbestigasyon, ang biktima nakaangkon og samad sa iyang dughan nga gituohang maoy hinungdan sa iyang kamatayon. Nagtuo ang kapolisan nga ang biktima gilugos kay nagkupot man kini sa iyang underwear ug daw giduot kini sa iyang dughan ug natabonan ang iyang samad apan nagsul-ob pa kini sa iyang karsones ug blouse.

Si PO2 Steve Booc nga nahinabi sa The Freeman/Banat News miingon nga kataposang nakit-an ang biktima kuyog sa iyang menor nga uyab nga naglakaw-lakaw sa merkado pasado alas 7:00 niadtong Biyernes sa gabii.

Apan si Booc wala kaayo mohatag og detalye sa uyab sa biktima ug miingon si Booc nga ihatod unta sa uyab  niini ang biktima apan mibalibad kini.

"Sudlunon ning balay sa biktima tungason pa'g bungtod unya maagian ra nang menteryo...mao to nibiya na’ng laki kutob ra siya sa eskina kay mibalibad man siya (biktima)," matud pa ni Booc. Napalgan na lang ang patay nga lawas ni Solano sa usa ka concerned citizen pasado ala-una sa hapon sa adlaw nga Sabado. (BANAT NEWS)