Dole naghuwat pa sa report sa CCC

CEBU, Philippines - Gipaabot  sa mga kadagkoan sa Department of Labor and Employment (DOLE)7 ang report sa Carmen Copper Corporation (CCC)  bahin sa kamatayon sa usa sa mga trabahante niini nga nagmaneho sa pison.

Ang Provincial Director sa DOLE nga si Maria Grace Villagonzalo-Diaz mibutyag sa Banat News nga ila  na nga gitawagan  ang CCC bahin sa maong insidente ug nangayo na sila sa detalye  sa kamatayon  ni  Rolando Astromo, 40, minyo, nga taga sitio Panagdait,  barangay  Don Andres Soriano, dakbayan  sa Toledo.

Apan matud ni McBeth Montecillo nga taga  DOLE  usab nga normal nga buhaton  sa panahon nga dunay mahitabo nga mopahibalo ang  mga  opisyal  sa kompaniya  ngadto  sa  DOLE.

Kini  aron  nga ang  maong ahensya  makapadala  dayon  og inspector sa kompanya aron masusi ang kahimtang sa trabahante  nga nadisgrasya.

Gitataw ni Montecillo nga sulod sa 24 oras kinahanglan nga ipahibalo gyud sa mga kompanya ngadto sa DOLE ang mga insidenteng  mahitabo.

Samtang si Diaz miingon nga gipakatap na sa iyang buhatan ang mga inspectors aron mosusi sa mga building sa tibook probinsya aron masuta ang kahimtang niini.

Matud ni Diaz nga dunay mga tag-iya sa mga building nga mialayon  kanila  apan ang ubang kompanya wala mopasulod sa mga inspector tungod kay padayon pa gihapon ang pagtay-og sa yuta.

Misulti si Diaz nga skeletal force lang gihapon ang naglihok sa ilang buhatan tungod sa linog apan normal na ang ilang operasyon . (BANAT NEWS)