Gibunlot sa may tigbakayan gipusil patay

CEBU, Philippines - Usa ka lalaki nga nagbarog sa tindahan duol sa usa ka tigbakayan ang gibunlot ug gipusil patay sa usa ka lalaki sa sitio Bay-ang, barangay Bairan sa lungsod sa Asturias sa alas 5:00 sa miaging hapon. Si PO2 Ariel Taguiam nga nahinabi sa Banat News miila sa biktima nga si Secfriano Rangos Demetellier, 29- anyos, molupyo sa sitio Bay-ang, barangay Bairan sa lungsod sa Asturias.

Samtang ang suspetsado naila nga si Adimar Juntong Mangitngit, molupyo sa barangay Bairan sa lungsod sa Asturias.

Matud pa ni PO2 Taguiam nga ang biktima nagbarog sa usa sa mga tindahan duol sa tarian dihang kalit nga miabot ang suspetsado ug gibunlot ang biktima kinsa miesplikar ngadto sa suspek nga di sila kontra.

Dugang ni Taguiam nga gipusil sa suspetsado ang biktima gamit ang kalibre .45 sa makatulo ka higayon apan usa lang ka bala ang nakaigo kaniya diha sa paa.

Daling misibat ang suspetsado human sa pagpamusil ug gituohang didto nagtago-tago sa bukirang bahin sa lungsod sa Asturias.

Matud pa ni Taguiam nga sa paghiling nga gihimo ni Dr. Zalde Climaco  nakaangkon og samad sa tuong paa ang biktima nga duol sa bugan niini ug posibleng naigo ang dakong ugat sa paa nga maoy hinungdan sa hinanaling kamatayon niini tungod sa pag-awas sa dugo. Narekober sa kapolisan ang duha ka basiyo sa kalibre 45 sa crime scene ug padayon ang imbestigasyon sa maong pagpatay. (BANAT NEWS)