DSWD-7 nagkinahanglan og tabang alang sa pagpamutos og hinabang
CEBU, Philippines - Nakahatag na og hinabang ang Department of Social Welfare and Development 7 sa mga apektadong pamilya sa Bohol matud pa sa usa ka opisyal niini.
Matud ni Jaybee Binghay nga otso mil ka family packs ug 10 mil ka mga bottled water sa mga apektadong pamilya ang ilang nahatagan.
Si Binghay miingon nga dul-an na og 38 mil ka mga pamilya ang ilang natabangan ug mikabat na og 166 mil ka mga tawo ang nakapahimulos sa maong tabang.
Dugang ni Binghay nga giapod-apod nila ang mga family packs sa 77 ka mga evacuation centers sa Bohol.
Miingon si Binghay nga dihang miigo ang linog sa Bohol mipadala gilayon ang ilang ulohang buhatan og P10 milyones aron sa pagpamalit og hinabang sa mga apektadong pamilya.
Target sa DSWD 7 nga makapamutos sila og 10 mil ka family packs matag adlaw aron maapod-apod sa mga tawo sa Bohol. Gi-recall na sa DSWD 7 ang kapin sa 900 ka mga empleyado niini nga nag-leave aron makatabang sa pagpamutos sa mga hinabang.
Nagbarog na usab ang operation centers sa Bohol ug ang uwahing kasayoran nga ilang nadawat nga dili pa gihapon maabot nila ang lungsod sa Clarin ug sa Maribojoc.
Padayon ang packing karon sa DSWD 7 ug gipadala na sab sa Bohol ang lima ka mga stress debriefing experts. Hangyo ni Binghay sa mga tawo nga motabang unta kanila og pagpamutos aron nga daghan sila og mapadala sa Bohol. (/EIM) (BANAT NEWS)
- Latest
