DOLE motabang sa nawad-a’g trabaho tungod sa linog

CEBU, Philippines - Mga apektadong trabahante nga nawad-a’g trabaho tungod sa linog tabangan sa Department of Labor and Employment  aron makatrabaho.

Ang Provincial Director sa DOLE Maria Grace Villagonzalo-Diaz nga nahinabi sa Banat News miingon nga andam sila nga motabang sa mga trabahanti nga naapektahan sa linog.

Lakip na niini ang mga vendors, mag-uuma, mangingisda nga wala na nakabalik sa ilang panginabuhian tungod sa linog.

Sumala pa ni Diaz nga dunay programa nga giandam ang DOLE alang niining mga panahona, ubos sa maong programa hatagan og trabaho ang mga tawo nga apektado sa katalagman. Apan usa sa giatubang niini nga problema karon mao ang election ban.

Ang buhaton lamang sa mga tawo nga naapektahan sa linog mao ang pagpangayo og certification sa social worker sa tagsa-tagsa ka mga lungsod ug dakbayan nga naapektahan sila sa linog.

Hatagan dayon sa DOLE og emergency employment ang maong mga tawo nga matud pa ni Diaz nga makatrabaho sa mga ginagmay nga infrastructure project sa tagsa-tagsa niini ka mga lungsod ug dakbayan.

Busa nangita na karon ang DOLE og mga Non-Government Organization (NGO) o mga People’s Organization (PO) aron mahimo niining partner sa maong programa.

Matud pa ni Diaz nga kun duna na sila’y partner nga mga NGO ug PO mahimo nang makapagawas og pundo ang DOLE tungod kay gidili man panahon sa election ban nga mo-hire og mga trabahante. (/EIM) (BANAT NEWS)