Public market sa Mandaue susihon pa

CEBU, Philippines - Higpit nga pakisusi ang ipahigayon sa  mga civil engineer ug mga structural engineer sa merkado publiko  sa dakbayan sa Mandaue una kini  magamit sa publiko.

Kini ang gipadayag ni Konsehal Jimmy Lumapas,  chairman sa committee on market sa konseho sa maong dakbayan nga nahinabi sa Banat News kagahapon sa buntag.

Matud pa ni  Lumapas nga ang sugyot  sa mga engineer nga ilang tahasan sa paghimo og pakisusi maoy ilang sundon sanglit sila man ang mga batid ug adunay igong kabangkaagan sa pagsuta sa  kalig-on sa usa ka edipisyo.

Kahinumdoman nga ang bag-ong merkado publiko nga nahimutang sa sitio Tribunal, sa barangay Centro  naplano  sa panahon  pa  ni  kanhi  mayor  ug  karon provincial  Board Member Thadeo Ouano.

Kini human  sa sunog  nga  miugdaw  sa karaang merkado niadtong Enero 30, 2004.

Naabtan kini sa pagkatapos sa termino ni Ouano apan si Mayor Jonas Cortes mao na gayod ang hingpit nga nakapatukod  sa maong         edipisyo.

Si Konsehal Lumapas sa iyang pamahayag miingon nga dili angay nga mabalaka ang mga Mandauehanon bisan kun dili na gayod kapuslan pa ang nahisgotang merkado sanglit aduna man kini insurance ubos sa Government Service Insurance System kon GSIS.

Si Mosuline Suliva nga maoy market administrator sa nahisgotang merkado nga nahinabi sa Banat News miingon nga ang bakanteng luna nga nahimutang sa nahisgotang merkado mao lamang una ang  termporaryo nga ukopahon sa mga manindahay.

Gitataw niya nga nagpatukod sila og mga payag-payag nga kapahimutangan sa mga gitinda nga bugas,  mga utanon, isdaan ug karnehan kay pinaagi lamang niini magpadayon gihapon ang naandang panginabuhi sa mga manindahay. (/WC) (BANAT NEWS)