Nakalas sa linog miabot na og 172

CEBU, Philippines - Nagkadaghan ang tawo nga nakalas human miigo ang linog sa lungsod sa Carmen sa Bohol alas 8:12 sa buntag niadtong petsa 15 sa Oktubre.

Niabot na og 172 ka mga tawo ang nakalas ug 281 ang naangol matud pa sa talaan sa Regional Disaster Risk and Reduction Management Council alas-2 sa hapon kagahapong adlawa.

Sa Probinsya sa Bohol, 159 na ka tawo ang namatay ug 188 ang angol samtang usa ang namatay sa Siquijor, ug siyam sa dakbayan ug lalawigan sa Sugbo.

Duna nay 89 ka mga evacuation centers ang gimuntar sa RDRRMC ug kapin sa 110 mil ka mga tawo ang kasamtangang nagpuyo niini.

Pabilin nga dili maagian ang 14 ka mga major roads sa Bohol ug dili pa magamit ang 11 ka mga taytayan sa tibook probinsya niini.

May sinkhole sab nga nakit-an sa barangay Monte Suerte, sa Lungsod sa Carmen sa probinsya sa Bohol. Nidahili sab ang pipila sa mga bukid sa sikat nga Chocolate Hills sa Bohol ug padayon nga walay kuryenti ang pipila ka mga lungsod apan nabalik na ang kuryenti sa 39 ka mga lungsod sa Bohol. Padayon ang pagsusi sa Mines and Geosciences Bureau sa mga lugar sa Cebu ug Bohol nga padayon ang pagdahili sa yuta.

Samtang ang National Telecommunications Commission mipadala sa ilang mga volunteers aron mahibalik ang komunikasyon sa Tagbilaran.

Ang United Nations Office for the Coordination of Humanitarian Affairs (UNOCHA) ug ang ASEAN Coordinating Centre for Humanitarian Assistance on Disaster Management mipadala na og suporta ug hinabang.

Samtang dunay Malaysian rescuers ang nangabot kagahapon sa hapon diha sa Benito Ebuen Air Base sa Mactan nga molahos sa Bohol aron motabang sa operasyon. (/EIM) (BANAT NEWS)