Mga relief goods naglisod pag-abot sa Loon ug Maribojoc sa Bohol

CEBU, Philippines - Naglisod pag-abot sa lungsod sa Loon ug Maribojoc ang Regional Disaster and Risk Reduction Management Center 7.

Matud ni Flor Gaviola nga nahinabi sa Banat News nga na-isolate ang duha ka lungsod ug dili gyud maagian ang mga dalan padulong didto tungod sa nangaputol nga mga dalan ug taytayan.

Sumala pa ni Gaviola nga kinahanglan mogamit sila og pump boats para maabot ang maong mga lungsod.

Apan miingon si Gaviola nga sumala pa ni Cesar Villarin ang Action Officer sa RDRRMC nga padayon ang clearing operations sa Department of Public Works and Highways sa maong mga lungsod.

Matud ni Gaviola nga gikatakda nga mobisita  sa Bohol ang director sa Office of Civil Defense nga si Minda Manto  karong adlawa.

Miingon si Gaviola nga napadala na sa Bohol ang mga hinabang alang sa naapektahan sa linog sakay sa eroplano nga gipadala sa National Disaster and Risk Reduction Center.

Sumala pa sa ulahing tala sa RDRRMC sa alas-12 sa udto kagahapon miabot nag 158 ang nakalas sa maong linog ug 281 ang naangol.

Ang Bohol ug Cebu mideklarar na og state of calamity aron mas mapadali ang pagpagawas og calamity funds nga magamit sa mga nabiktima. (BANAT NEWS)