Pista sa Talisay malinawon bisa’g linog

CEBU, Philippines - Pagsaulog sa pista sa dakbayan sa Talisay niadtong Martes malinawon matud sa officer-in-charge sa Talisay City Police Station nga si Superintendent Resty Santos.

Si Santos nga nahinabi sa Banat News kagahapon nagkanayon nga malinawon ang kasaulogan sa pista sa siyudad gawas lang sa mga alarma nila sa mga hubog diin gi-refer nila kini ngadto sa barangay.

Matud ni Santos nga sukad niadtong opening salvo sa Oktubre 1, 2013 hangtud sa adlaw sa pista sa Oktubre 15, 2013 wala sila’y nadawat nga mga alarma sa gubot atol sa pagpahigayon sa mga kalingawan.

“Kaluoy sa Ginoo gikan sa pagsugod sa opening salvo hangtud niadtong Martes sa gabii walay dagkong hitabo, kasagaran natong alarma mga hubog lang unya i-refer namo sa barangay,” ni Santos pa.

Atol sa adlaw sa pista huot kaayo ang kadalanan sa siyudad ilabi na diha sa barangay Poblacion tungod sa mga naninda ug mga tawo nga nanuroy.

“Huot ang karsada pero kaluoy gyud sa Ginoo walay dagkung alarma,” dugang ni Santos.

Ang mga lugar diin gipahigayon ang mga kalingawan sa pista ug daghang mga tawo dunay mga gipakatap nga polis ug mga sakop sa Barangay Intelligence Network (BIN).

Gawas niini ang mga mobile patrol car padayon gihapong nagpatrolya sa kadalanan.  Hinuon tungod sa nahitabong linog niadtong Martes sa buntag naobserbahan nga sayo kaayong namingaw ang kadalanan sa Talisay.

Apan daghang mga negosyante nga nangandam unta alang sa maong pista ang nangaalkanse tungod kay sayo kaayong namingaw ang kadalanan ug menos kaayo ang mga tawong naglingaw-lingaw.

Gidudahan nga ang nahitabong linog atol sa kapistahan maoy hinungdan nga mikalma ang mga tawo sa pagsuroy-suroy nunot sa nagsunod-sunod nga mga aftershocks. (BANAT NEWS)