Branch manager og fastfood chain nalutsa’g warrant sikop

CEBU, Philippines -  Nagtingkagol sa Talisay City Jail ang branch manager sa usa ka sikat nga fast food chain nga nahimutang diha sa Jones Avenue, dakbayan sa Sugbo human kini masikop sa mga polis tungod sa kaso niining acts of lasciviousness.

Ang suspetsado mao si Mark Anthony Rodriguez, 32-anyos, taga Stockton Village, Punta Princesa, dakbayan sa Sugbo.

Ang mga polis sa Talisay City Police Station nga gipangulohan ni Senior Inspector Al Pascual maoy mi-serve sa warrant of arrest nga giluwatan ni Judge Mario Manayon sa Municipal Trial Court in Cities, Branch 01 sa dakbayan sa Talisay batok kang Rodriguez.

Si Pascual nga nahinabi sa Banat News mibutyag nga ang insidente dugay-dugay na kining nahitabo diha sa branch sa nahisgutang fast food chain sa usa ka mall sa barangay Tabunok, Talisay.

Giingong ang biktima ni Rodriguez ang babaye nga service crew sa maong kan-anan.

Niadtong higayona giingong si Rodriguez usab ang branch manager diha sa Tabunok.

Dugang ni Pascual nga didto nila masikop si Rodriguez sa branch sa Jones diin ilaha kining gihuwat nga motambong sa trabaho niini mga alas 12:40 sa hapon niadtong Lunes.

Gikan sa Talisay city detention cell si Rodriguez gibalhin dayon kini ngadto sa Talisay City Jail sa barangay Maghaway. (BANAT NEWS)