Sinkhole mibutho sa Lapulapu city

CEBU, Philippines - Gimando sa buhatan sa  Disaster Risk Reduction and Management Council sa dakbayan sa Lapulapu ang lima ka pamilya nga nagpuyo sa purok Kapayas, dakbayan sa Lapulapu sa pagbakwit tungod sa pagtumaw sa sinkhole nga nakaguba sa  mga bungbong niini.

Si Andy Berame sa CDRRMC sa maong dakbayan miingon nga ang mga panimalay nga gipanag-iya ni Jimmy Berdin nga nahimutang lamang sa usa ka compound ug gipuy-an usab sa lima ka pamilya nga nag-abang niini.

Matud pa niya 15 ka metros ang diyametro o ang baba sa lungag ug usa ka tiil ang gilawmon sa pagkahulpa sa yuta niini. Dugang pa ni Berame nga daghang bakante nga mga panimalay nga gipaabangan sa sulod sa compound nga gipanag-iya gihapon ni Berdin maoy gibalhinan sa lima ka pamilya.

Si PO1 Ortezuela sa kapolisan sa Presinto 1 sa isla sa Olango sa maong dakbayan nga nahinabi sa Banat News miingon nga bisan sa kusog nga pagtay-og nga ilang nasinati apan wala sila makadawat og mga taho nga adunay naangol o kinabuhing nakalas.

Gitug-an niya nga daghan hinuon ang gibati og kahadlok sa mga molupyo sa kabalaka nga human sa kusog nga pagtay-og maoy magsunod ang tsunami.

Si Mayor Paz Radaza miawhag sa tanan pagsiguro sa ilang kaluwasan sa pagpahiluna sa luwas nga lugar sa panahon nga masinati ang kusog nga pagtay-og. (BANAT NEWS)