Lima patay sa Pasil

CEBU, Philippines - Patay ang lima ka tawo nga nadat-ogan sa nahugno nga concrete gutter sa Pasil Fish Port sa nahitabong 7.2 magnitude kagahapon. Nadugang sa dul-an 100 nga nakalas sa Central Visayas.

Ang mga namatay nanginabuhi sa maong merkado nga naila nga sila si Leona Cabarubias, 66, vendor, molupyo sa Brgy. Sawang Calero, Randy Bondoc, 46, vendor, molupyo sa barangay Tinago,  usa ka naila lang sa pangalang “Berto” ug usa ka “Roger” nga nagsul-ob og dark blue nga t-shirt ug blue short.

Ang anak  ni Leona Cabarubias nga si Edwin kinsa daling miabot sa dapit dili makatuo sa nahitabo sa inahan apan gidawat niya ang gidangatan niini.

Diha usab sa hawan nga bahin sa San Nicolas Parish Church sa atubangan sa Pasil Fish Market nagpundo ang mga residente nga namiya sa ilang mga panimalay.

Ang mga bag-ohay pang nagsugod unta og training nga mga rescuers sa Bureau of Fire Protection Special Rescue Unit maoy daling nakaresponde ug nagtinabangay sa pag-ugkat sa mga nadat-ugan. Gamit ang ilang mga kamot, maso, silsil ug jack gihinay-hinay nila og kuha ang mga biktima gikan sa mga kongkretong gutter gikan sa atop sa maong merkado samtang nagsige og bantay sa nahibiling nagbitay pang kongkretong slabs sa ibabaw.

Si Fr. Trinidad Silva sa San Nicolas Parish Church mihatag dayon og pag-ampo alang sa minatay sa matag patay’ng lawas nga makuha ug gibutang sa tulda nga holding center sa mga biktima. Si Mayor Michael Rama ug Vice Mayor Edgar Labella uban ni Atty. Joey Daluz ug mga opisyal sa city hall daling misusi sa nahitaboan.

Gimando ni Rama nga dili una pasudlan ang maong merkado hangtud nga dili pa masigurong luwas gamiton. Mao gihapon kini ang pahimangno niya sa mga establisamento nga kinahanglang masusi una ang ilang mga buildings una pa mangabli. (BANAT NEWS)