Ilegal nga sugal ug drugas naghitak sa Talisay

CEBU, Philippines - Padayong gipatuman sa kapolisan  sa dakbayan  sa Talisay  ang  subsob  nga kampanya  batok  sa illegal  nga  sugal hinungdan  nga  nakasikop na sila og  pito  ka video karera machine  nga  gipundo   karon sa provincial headquarters.

Si Superintendent Resty Santos, officer-in-charge sa Talisay City Police Station nagkanayon wala  silay  nadakpan  nga  mga  sugarol tungod  sa kaabtik  niini  managan  inig-abot  na  sa  kapolisan  nga  moronda  sa maong  mga  sugalan.

Maoy hinungdan  nga   giangkon ni Santos nga dili gyud higpit nga mawagtang  ang  illegal  nga  sugal tungod kay  ang  mga sugarol  magtago-tago  sa hilit  nga  mga  lugar.

Gibutyag ni Santos nga  pipila  sa  mga  sugal  sa  Talisay  nga  ilang  nadiskobrehan  mao  ang  masiao  ug  video karera .

Apan          matud ni Santos nga kasagaran  masakmit  dayon  ang  video karera  kay anha  ra kini  ibutang  sa  payag-payag ug walay moangkon nga operator niini  kun  sukiton  sa  kapolisan.

Hinuon  sa  masiao  makadaginot   sila  og  tagsa  ka sugarol  matag  buwan nga  madakpan  ug  pasakaan  dayon  nila  og  kaso.

Dugang ni Santos nga gawas sa ilegal nga sugal padayon usab ang ilang pagpahigayon og mga saturation drive batok sa ilegal nga drugas sa dakbayan  sa Talisay. (/WC) (BANAT NEWS)