Brgy.Kagawad sa sibongagipaulana’g bala patay

CEBU, Philippines - Patay ang usa ka kagawad sa barangay human gipusil sa wala pa mailhing mga lalaki nga nagsakay og motor sa barangay Manatad sa lungsod sa Sibonga sa lalawigan sa Sugbo sa alas 8:00 sa miaging gabii.

Giila sa kapolisan ang biktima nga si Gomersindo Sabanal, 49, negoyante, ug kagawad sa barangay Manatad sa lungsod sa Sibonga.

Matud pa ni PO2 Arnold Frenal sa Banat News nga ang biktima kuyog sa laing duha ka mga lalaki naglingkod kilid sa karsada dili halayo sa iyang balay niadtong tungora.

Dihang usa ka puti nga Suzuki Smash nga motor nga dunay duha ka mga lalaking nagsakay ang mihunong sa ilang tungod ug ang backrider kalit nga mipusil kang Sabanal sa makadaghang higayon.

Tungod sa kakalit sa panghitabo ang duha ka kauban ni Sabanal nga naglingkod kilid sa karsada mikaratil usab og dagan tungod sa kahadlok nga sila ang isunod.

Human niini daling mipasirit og padagan ang duha nga nagmotor padulong sa barangay Papan sa lungsod sa Sibonga.

Ang biktima daling gidala sa Carcar City District Hospital apan gideklarar nga dead on arrival.

Narekober sa kapolisan ang upat ka  kabhang sa carbine ug usa ka slug sa wala pa matino nga armas.

Gimandoan ni Cebu Provincial Police Office director Sr. Supt. Noel Gillamac ang hepe sa Sibonga Police Station nga si Chief Insp. Bonifacio Tecson nga  palawman pa ang imbestigasyon sa maong kaso ug tan-awon ang tanang posibleng anggulo sa maong pagpamusil.

Si Tecson nagkanayon nga ilang gisubay ang love triangle, politika, negosyo ug mga nakabangi ni Sabanal nga posibling may kalabotan sa iyang kamatayon.

Matud pa nga dunay nadawat nga impormasyon ang mga imbestigador nga may gikarelasyon si Tecson nga babaye sulod sa tulo ka tuig apan giingon nga nagbuwag na sila usa ka buwan na ang milabay.

Samtang sa negosyo ila usab nga gitan-aw sanglit maayo man modala og tawo ang biktima ug wala kini nakabangi sa iyang negosyo sa pagpamalit og kahoy.

Wala say gikabangi ang biktima nga duha na ka terminong konsehal sa barangay Manatad. Apan miingon si Tecson nga ang bata-bata ni Sabanal nga si “Ren-ren” Padigos nalambigit sa pagpamusil sa lungsod sa Argao niadtong Hulyo apan giingong mitestigo ang konsehal pabor sa iyang bata-bata.

Gisusi karon ang maong anggulo tungod kay may text sa cellphone sa kagawad nga miingon nga “dunay mamatay karong semanaha.”

Sa report sa Balitang Bisdak kagahapon, ang kapikas sa kagawad mikompirmar nga dunay karelasyon ang iyang bana apan gibuwagan na niya kini apan sukad niadto kanunay nga tunguhon sa maong babaye ang iyang bana. (/EIM) (BANAT NEWS)