12 pasahero naluwas sa natikyaob nga pump boat

CEBU, Philippines - Moabot sa 12 ka mga pasahero ang naluwas sa mga mananagat human ang gisakyan nila nga pump boat natikyaob  samtang naglawig sa kadagatan sa Hilutongan Channel sa lungsod sa Cordova niadtong miaging adlaw.

Ang mga biktima paingon unta sa Barangay Poblacion gikan sa Barangay Hilutongan, pipila ka kilometros ang gilay-on gikan sa mainland, sa dihang nahitabo ang maong aksidente.

Ang mga naluwas giila nga sila si Crisalda Arong, 51; Delia Pindang, 39; Reymart Pindang, 4; Lilian Nacua, 44; Vicenta Premacio, 44; Rodrigo Gabriel, 49; Florafe Taneo, 14; Rose Sagarino, 28; Genalyn Primacio, 23; Christine Menguito, 20; Ryan Angco 14 ug ang operator sa pump boat nga si Anolito Arong, 30. Si SPO1 Danny Alburo, desk officer, mibutyag nga paingon na sa Cordova ang mga biktima sa dihang gihapak ang pump boat sa dagkong bawod hinungdan sa pagtikyaob niini.

Si Alburo midugang nga human ma-rescue ang mga biktima gidala na sila pagbalik sa ilang barangay.

“Gipapauli ra sila dayun balik sa ilaha human sila mahatod sa mananagat,” matud niya.

Daan nang mipasidaan ang Pagasa nga makasinati og balurong kadagatan ang pipila ka bahin sa nasud samtang nagpadulong sa gawas sa nasud ang bagyong Santi. (/EIM) (BANAT NEWS)