11-anyos angol human milayat sa gikapyotang sakyanan
CEBU, Philippines - Naangol ang usa ka 11-anyos nga batang lalaki human kini milayat gikan sa sakyanan nga iyang gikapyotan diha sa barangay Nug-as, lungsod sa Alcoy sa miaging Sabado sa buntag.
Ang biktima mao si Brian Bentasal Decon, residente sa maong dapit, nakaangkon kini samad sa ulo ug pangos sa lawas ug daling gidala ngadto sa Julio Cardinal Rosales Hospital sa lungsod sa Dalaguete.
Si PO2 Marvel Pardo sa Alcoy Police Station mibutyag sa Banat News nga ang Mitsubishi Delica 4X4 nga nagtangag sa plakang YHL-128 nga gimaneho ni Carlos Amancio, 52, taga barangay Obo, Dalaguete nagparada diha sa lugar.
Matud ni Pardo nga niadtong higayona tabo sa lugar ug ang ginikanan sa bata naninda og mga utanon samtang si Amancio dunay gihatud diha sa nahisgutang dapit.
Ang bata giingong misaka kini sa sakyanan ug wala mabantayi ni Amancio nga dunay bata sa likod ug sa iyang pagpadagan kalit kining milayat gibana-banang 100 ka metros na ang gilay-on gikan sa tabo.
Matud ni Pardo nga posibleng nahadlok lang nga mopara o ba kaha dili na mohunong ang sakyanan ug madala siya ngadto sa layo hinungdan nga kini milayat. (/EIM) (BANAT NEWS)
- Latest
