Gisaghiran mao pay gipatay

CEBU, Philippines - Drayber nga delivery truck sa softdrinks patay ug angol ang helper niini human pusila sa drayber sa sakyanan nga nakasaghid kanila human sa ilang ginukdanay sa national highway sa sitio Cabulihan sa barangay Ilihan sa dakbayan sa Toledo sa alas 6:45 sa miaging gabii.

Si SPO4 Carmelito Hornales nga nahinabi sa Banat News miila sa namatay nga si Joel Opsimar Bonghanoy,  32, kasamtangang nagpuyo sa barangay Magdugo sa dakbayan sa Toledo apan lumad nga taga Tabon, Villahermosa, Negros Oriental.

Samtang ang helper niini nga naangol naila usab nga si Dionesio Tangoan Traya, 28, taga barangay Bulongan sa dakbayan sa Toledo.

Matud pa nga padulong ang duha sa barangay Magdugo dihang nasaghiran ang walang side mirror niini sa usa ka Isuzu Forward nga may plate number YAB 773.

Apan inay nga mohunong, gikatahong mipakusog og padagan ang maong Isuzu Forward maong gigukod kini sa biktima ug dihang naapsan mikanaog ang biktima kuyog sa iyang helper ug gikomprontase ang drayber sa pikas nga trak.

Apan nakugang na lang sila nga mibunot hinoon ang wala mailhing drayber og wala matinong armas ug mipusil sa walang dughan ni Bonghanoy ug sa wala nga abaga ni Traya.

Human nangahagba ang duha daling mipasirit ang suspek ug mibiya sa lugar samtang patay na pag-abot sa Toledo District Hospital si Bonghanoy human matan-aw ni Dr. Arlene Perez.

Padayon karon ang manhunt operation sa kapolisan sa Toledo City sa pag-ila sa drayber sa maong Isuzu Forward subay sa plate number nga ilang nakuha. (/EIM) (BANAT NEWS)