Mayor JVR mipasigarbo sa iyang kalampusan

CEBU, Philippines - Si Mayor Johnny De los Reyes sa dakbayan sa Talisay mipadayag nga daghan siya og programa alang sa mga kabus  sa maong dakbayan.    

Niadtong Huwebes maoy ika-100 days ni De los Reyes sa iyang paglingkod isip mayor sa siyudad. Atol sa iyang pagpamulong sa nahisgutang adlaw  sa atubangan sa hawanan sa city hall gipasigarbo sa mayor ang mga kalamboan nga iyang nabuhat sulod  sa 100 days niyang pagpamuno. Ang nahisgutang kalamboan naglangkub sa pagpatukod niya sa Talisay City Indigent Pharmacy nga nahimutang sa ubos nga bahin sa city hall.

Ang mga kabus nga Talisaynon makakuha og libreng tambal sa nahisgutang botika ubos sa referal o confirmation sa city social welfare. Ang maong botika sa siyudad mamaligya usab  og baratong mga tambal. Kabahin sa peace and order, ang mayor mihatag og suporta  nga duha ka mga bag-ong Inova patrol car  ngadto sa kapolisan.

Tumong sa mayor nga mapadayon sa kapolisan ang kalamboan sa pagmentenar sa kahusay ug kalinaw sa Talisay.

Namalit  usab  siya   og  ambulansiya alang sa Talisay City Rescue Emergency Action Team (TREAT) ug sa Rural Health Unit (RHU) I, II ug III.

Gawas niini ang Talisay City Solidwaste Management gipalitan usab og duha ka mga bag-ong garbage truck aron matibhangan ang ilang problema sa pagkolekta sa mga basura.  Laing gipasigarbo sa mayor nga kalamboan mao ang pagpaaspalto niya sa mga gubaong karsada sa siyudad.     

Ang "Adopt a Talisaynon Program" nga  gihimong  nag-unang panginahanglan  sa mga establisamento sa siyudad mao nga ang  pagdawat  og  mga  aplikante  nga Talisaynon. Sa plastic banning ang tanang mga establisamento sa Talisay gidid-an na sa paggamit og mga plastic bag nga iputos sa ilang tinda.

Lakip sa gipasigarbo sa mayor ang pagpabalik sa mga vendor  sa merkado publiko sa Tabunok gikan sa Lagtang, paghatag og libreng lungon sa mamatay  nga  kabus  ug libreng pagpalubong sa mga kabus nga namatay.  Ang plaza atubangan sa city hall nga proyekto kaniadto ni kanhi Kongresista Eduardo Gullas gipabuksan kini sa mayor alang sa publiko.  (BANATNEWS)