Lalaking nipatay sa ‘kabit’ sa asawa nakombikto sa kasong murder
CEBU, Philippines - Gikombikto ni RTC Jugde Simeon Dumdum sa kasong murder ang lalaki nga giakusahang nipusil patay sa gipasanginlan niyang kabit sa iyang asawa.
Kini human mapamatud-i sa mga ebidensiya sa prosekusyon nga gipusil gyud ni Ranulfo Largo ang biktimang si Doroteo Enejada Sr. nga lumad nga taga syudad sa Naga niadtong Pebrero 15, 2009.
Si Judge Dumdum mipahamtang og silot nga reclusion perpetua o pagkabilanggo sulod sa dili mominus 20 ka tuig kang Largo.
Matud pa nga ang nakapalig-on sa maong kaso mao ang direktang testimonya sa testigos nga anak sa biktima nga si Doroteo Jr. nga kuyog siya sa iyang amahan sa pagsuroysuroy sa plaza sa syudad sa Naga atol sa pagpamusil.
Sigon pa niini nga samtang sila nagbarogbarog, kalit lamang giduol sa suspek ang iyang amahan sa suspetsado ug gipusil.
Sigon pa niini nga dihang natumba na ang biktima sa yuta giusban pa gyud sa pagpusil dungan sa pagsulti og: "nakabawos na gyud ko nimo tungod sa imong pagbinuang sa akong asawa."
Gidala sa tambalanan ang biktima apan namatay na kini tungod sa daghang samad pinusilan sa biktima. Ang akusado igo lang midepensa sa maong kaso pinaagi sa pag-ingon nga wala siya sa maong dapit atol sa pagkahitabo.
Apan si Dumdum miingon nga huyang ang rason ni Largo ug mas bug-at ang pamahayag sa saksi. (BANAT NEWS)
- Latest
