Mga opisyal sa Custom nag-inilogay sa puwesto
CEBU, Philippines - Duha ka mga dagko ug taas nga opisyal sa Bureau of Customs dinhi sa Sugbo miingon nga ilang gitahod ang pagkatudlo isip officer in charge sa Bureau of Customs Port of Cebu ni Atty. Paul Alcazaren.
Apan ilang giklaro nga magmakuli sila sa pagtuo sa imando niini tungod kay sumusunod o subordinate lamang kini nila sanglit ubos ra man kini og ranggo.
Ang nahisgutang duha ka mga opisyal mao sila si Deputy Collector for Assessment Atty. Lourdes Mangaoang ug Deputy Collector for Operation Francis Ahmed Erpe.
Sila pulos nagranggo og Collector VI ug mas taas og ranggo kang Atty. Alcazaren nga nagranggo lamang og Collector III.
Ang duha miklaro nga dili nila sundon si Alcazaren kun sila manduan kun unsay buhaton sa ilang buhatan.
Giangkon ni Mangaoang ug Erpe nga gubot ang sitwasyon karon sa Buro sa Adwana sa Sugbo tungod usab sa walay klarong kamanduan gikan sa labaw nilang buhatan. Si Mangaoang mideklarar nga gusto niyang hulipan si Alcazaren kay mas ubos kini niya og ranggo.
Gitinguha karon ni Mangaoang nga mopagawas na si Commissioner Rufino Biazon og kamanduan nga han-ayon ug tarungon ang buhatan sa Bureau of Customs Port of Cebu human niya kini padalhi og memorandum nga nagpahibawo sa bakikaw nga sitwasyon sa Buro sa Adwana sa Sugbo karon.
Si Mangaoang ug Erpe mibalik sa ilang karaang posisyon human makakuha og TRO dihang gidestino sila sa Customs Policy and Research Office (CPRO) sa kaulohan ilawom sa Department of Finance. (BANAT NEWS)
- Latest
