Kapitan Rama gipasakaa’g kiha

CEBU, Philippines - Si Kapitan  George Rama sa  Barangay Basak-San Nicolas  gipasakaan og reklamo didto sa Cebu City Council tungod kay matud pa midumili nga ang kahugpongan sa mga basketbolista makaduwa sa gymnasium sa barangay.

Si Voltaire Cuta, nagpuyo sa Alumnos, Mambaling ug pangulo sa Alumnos Basketball Association, nagtoo nga ang rason nga gidid-an sila ni Kapitan Rama nga makahimo og basketball tournament sa gym mao nga dumadapig sila sa Bando Osmeña Pundok-Kauswagan (BOPK).

Gisaysay ni Cuta sa iyang affidavit-complaint nga gisumiter sa City Council nga ang rason ni Kapitan Rama nga wala sila tuguti nga makahimo og tournament mao nga adunay laing mogamit sa gym kaniadtong Mayo 13, 2012.

Matud ni Cuta nga kinalit-kalit kaayo ang gihimo ni Kapitan Rama nga pagbabag kanila tungod kay ang grupo nga gitugotan niini nga makagamit sa gym adto g’yud unta mogamit sa gymnasium sa Vicente Rama High School.

Si Cuta miingon nga gisusi nila didto sa Vicente Rama Gymnasium ug wala gayo’y migamit sa mao nga gym ug nasabtan nila nga gibalhin ang duwa sa maong grupo didto sa Alumnos gymnasium aron nga dili sila makapahigayon sa ilang tournament.

Dugang pamahayag ni Cuta nga liwas sa eleksyon kaniadtong Mayo, gisirad-an ang gym sa Alumnos apan gibuksan kini pagbalik kaniadtong Agosto.

Ang grupo ni Cuta mipadala na usab og suwat-hangyo ni Kapitan Rama aron mogamit sila sa gym alang sa ilang practice sa nagsingabot nga Christmas Basketball League apan matud pa nga sila gibalibaran sa kapitan.

Matud ni Cuta nga ang rason nga sila gibalibaran sa pagpagamit mao nga sila dumadapig sa BOPK. Si Cuta nakahukom nga mopasaka og kaso batok ni Rama kay aron kini masilotan.

Si Rama wala pa kini makuhai og pamahayag kabahin sa pagpasaka og kaso ni Cuta batok kaniya sanglit wala siya sa barangay hall ug dili makontak sa iyang mobile phone.

Ang abogado nga si Reymelio Delute nga maoy makigsangka ni Kapitan Rama sa pagka kapitan sa Basak-San Nicolas umaabot nga eleksyon maoy miabag ni Cuta nga mapasaka ang kaso. Matud ni Delute nga duna pa sila’y laing kaso nga kriminal nga ipasaka ni Kapitan Rama ug posible nga adto na sa Ombudsman. (BANAT NEWS)