Lalaki nagpusil sa dughan patay

CEBU, Philippines - Patay ang usa ka tawo nga gituohang naghikog pinaagi sa pagpusil sa iyang walang dughan sa sulod sa lawak sa ikaduhang andana sa ilang panimalay sa barangay Umapad, dakbayan sa Mandaue alas 10 pasado ang takna kagahapon sa buntag. Ang namatay mao si Froiland Aberion, nagpuyo sa maong dapit ug nagtrabaho sa usa ka forwarding company nga nagbase sa maong dakbayan.

Si  SPO3  Juan Calamba sa kapolisan sa Presinto  5 sa Mandaue City Police Office  (MCPO) nga nagbase sa barangay Opao nga nahinabi sa Banat News miingon nga ang Grade IV nga anak niini gikan sa tulunghaan maoy nakadiskubre sa amahan nga patay na ug naligo na sa kaugalingong dugo nga naghigda sa kama.

Matud pa ni Calamba, ang  asawa miasoy nga natingala siya sa gihimo sa iyang bana sayo sa buntag kay gihatagan siya niini og P10,000 nga kuwarta.

Giasoy sa asawa sa namatay nga dihang gipangutana kini kun para sa unsa ang kuwartang gihatag niini, ang namatay igo lang miingon nga ipalit kini sa bisan unsa nga gusto niining paliton. Dugang pa  ni Calamba nga milakaw ang asawa kay nangompra alang sa ilang lutoonong mga pagkaon nga ibaligya ug nabilin ang bana.

Si Calamba miingon nga ang asawa  mibutyag nga adunay gihambin nga sakit ang iyang bana apan wala ibutyag kung unsa kini ug gituohan nga mao kini ang hinungdan sa paghikog niini.

Matud pa ni Calamba, nakuha  nila sa crime scene ang usa ka kalibre .38 nga armas nga adunay upat ka buhing bala ug duha ka mga kabhang sa tambor niini. (/EIM) (BANAT NEWS)