Rama mitambag sa mga kandidato

CEBU, Philippines - Si Mayor Michael Rama mitambag sa mga kandidato nga aron dili sila mahimong kawatan sa kwarta sa katawhan kun modaug sa eleksyon angay’ng dili sila mamaligya og kabtangan ug dili mangutang aron lang gastohon sa kandidatura.

Matud ni Rama    nga daku kaayo ang posibilidad nga ang  mga kandidato nga motuyo lang gayud pagpamaligya og kabtangan ingon man mangutang para sa eleksyon, mapugos sa pagpangawat sa kwarta sa kagamhanan aron mabawi ang ilang nagasto.

Tambag ni Rama nga dili himoong babag sa ilang tinguha paglansar og pwesto sa kagamhanan ang kakuwang og kwarta nga magamit sa ilang kandidatura. Matud sa mayor nga ang usa ka kandidato modaug ra gihapon bisan og wala kini kwarta kun makita sa katawhan nga siya sinsero nga moserbisyo alang sa kaayohan sa mga  molupyo.

Atol sa miaging kampanya sa eleksyon kaniadtong Mayo, si Rama nangangkon nga usa ra ka milyon ka pesos ang nadawat niya nga kontribusyon ug gikan lang sa usa ka tawo nga si Mariquita Salimbangon-Yeung, igsoon ni Kongresista Benhur Salimbangon.

Daghan hinoon ang wala motuo sa pangangkon ni Rama nga bugtong si Salimbangon ra ang mihatag kaniya og tabang-salapi aron gamiton sa pagpangampanya.  (BANAT NEWS)