Nanag-iya’g mga sakyanan dili magkompiyansa

CEBU, Philippines - Ang officer-in-charge sa Talisay City Police Station Superintendent Resty Santos nanawagan sa mga nanag-iya og motorsiklo nga dili magpataka og parking aron dili mabiktima sa mga karnaper. 

Ang maong panawagan sa OIC nunot kini sa report nga sa 50 ka mga police stations sa probinsiya ang dakbayan sa Talisay maoy dunay labing taas nga kaso sa pagpanagit og motorsiklo.

Si Santos mibutyag  sa mga tigbalita nga gikan niadtong buwan sa Enero ngadto sa Agosto mikabat ngadto sa 31 ang kaso sa pagpanagit og motorsiklo sa Talisay.

Matud ni Santos nga kasagaran kini nahitabo diha sa parking area sa usa ka dakung tindahan diha sa Tabunok diin ang mga tag-iya og motorsiklo kompiyansa kaayo nga moparada sa ilang sakyanan pagtuo nga walay manghilabot tungod kay naa kini sa tugkaran sa mall diin dunay mga gwardiya.

Ubang mga nanag-iya og motorsiklo anha moparada sa ilang sakyanan sa landong nga lugar apan mingaw hinungdan nga ang kawatan makahigayon na hinuon niini og dagit.

Si Santos nanawagan sa mga tag-iya og motorsiklo nga unta dili kini magpataka og parada sa ilang sakyanan ug kung pwede butangan og alarma sama sa mga kotse aron kung dunay laing tawo  nga mohikap niini mahibaw-an.

Matud pa ni Santos ang pagpakgang sa mga krimen di lang trabaho sa kapolisan kondili dako usab og papel ang komunidad.

Sumala pa niya nga nakig-coordinate na sila sa mga mall security personnel nga mamahimong aktibo sa ilang pagbantay. Gani duna nay mga close-circuit television camera nga gimuntar sa pipila ka mga parking lots sa mga tindahan.

Gibutyag sa OIC nga naniid sila karon sa mga namaligya og “chop-chop” o gipisa-pisa na nga mga parte sa motorsiklo diha sa siyudad.  (BANAT NEWS)