Dugang duha ka PUV terminals sa Cebu City tukoron

CEBU, Philippines - Duna nay mga investors nga nagtinguha pagtukod og duha ka terminal sa mga public utility vehicles (PUV) dinhi sa dakbayan sa Sugbo ug gitun-an na kini karon sa kadagkoan sa City Traffic Operations Management (CITOM).

Si CITOM chairman Ruben Almendras wala pa hinoon makabutyag kun kinsa kining duha ka magpapatigayon nga buot motukod og PUV terminal. Gipasabot ni Almendras nga nauyonan nila sa CITOM Board nga tugotan na ang pagbutang og daghang terminal aron nga makatabang kini sa pagsulbad sa grabeng kahuot sa mga sakyanan nga anha magdagan-dagan sa karsada.

Matud ni Almendras nga kun usa o duha lang ka terminal ang itugot nga maka-operate mahimong ang mga sakyanan anha lang sa karsada maglibut-libot aron mangita’g pasahero ug makadugang kini sa problema sa trapiko.

Dinhi sa dakbayan ang South Bus Terminal ug ang Citilink Terminal mao ra ang nag-operate alang sa mga sakyanan nga mobiyahe sa habagatan ug kasadpang bahin sa probinsya. Sa mga sakyanan nga nagbiyahe sa amihanang kalungsoran ug mga silingan nga syudad ang terminal nga ilang magamit mao ra ang sa Ayala, SM City ug White Gold.

Matud ni Almendras nga ang pagtugot nila og daghang terminal nga maka-operate gilantaw nila nga makapaminus gyud sa problema sa trapiko dinhi sa dakbayan.  (BANAT NEWS)