DOE di makapugong sa presyo sa lana

CEBU, Philippines - Dili makakontrol sa presyo sa lana ang Department of Energy matud pa ni Dir. Zenaida Y. Monsada atol sa Multi-Sectoral Campaign nga gipahigayon niini sa dakbayan sa Sugbo kagahapon.  Si Monsada miingon nga ang ilang trabaho mao lang ang pag-monitor sa presyo sa lana ug dili ang pagkontrol sa presyo niini tungod kay dili kini  mandato sa ilang opisina.

Sigun pa ni Monsada nga sa milabay nga panahon ang Energy Regulatory Board ang ahensya gitahasan sa pag-monitor sa presyo sa lana apan dihang giwagtang na kini naa na kanila ang tahas.

Apan gitataw ni Monsada nga ang ilang mahimo kutob lang sa pag-monitor sa presyo sa lana sa world market ug dili sa pag-monitor kun kinsa ang mga kompanya ang nag-overpricing.

“Para namo unfair kaayo nga kami maoy awayon or naa bay mga expectation nga we regulate prices dili man na apil sa among mandate, monitoring ra mi,” matud pa ni Monsada.

Gitataw niya nga dili lang sa Pilipinas ang ilang gi-monitor apan lakip na ang presyo sa lana sa world market.

Apan dako ang problema sa DOE matud ni Monsada tungod kay gamay lang ang trabahanti niini sa tibook Pilipinas ug dili nila maato ang pag-monitor sa matag lugar.

Ug matud pa ni Monsada nga daghang mga Local Government Unit nga wala makahibalo sa ilang  responsibilidad sa pagmonitor sa presyo sa lana sa ilang kaugalingong lungsod.

Matud pa nga trabaho sa mga lokal nga kagamhanan ang pagsukod  sa mga gasoline pumps nga naa sa ilang lungsod kun husto  ba ang  sulod  sa usa ka litro  niini. Apan ang problema kay walay kahimanan  ang  mga LGU.

Miingon si Monsada nga kun mabuhat kini sa mga LGU hayan nga makakuha  sila og kita sa maong calibration. (BANAT NEWS)