160 kilong salanga nakuha sa Argao gipalubong

CEBU, Philippines - Usa ka higanteng salanga (manta ray) ang nasangit sa pukot sa mga mananagat sa Barangay Langtad, lungsod sa Argao sa miaging gabii.

Matud pa nga nanagat sila si Joselito Manayan, 52, ug Rodulfo Gaurino, 39, sa dihang nahibulong sila nga bug-at kaayo ang ilang pukot ug sa dihang ila kining gibira nasangit niini ang salanga.

Si PO2 Brian Yosores sa Argao Police Station mibutyag nga patay na ang salanga nga adunay gibug-aton nga 160 kilos ug sobra sa usa ka dupa nga gilapdon. Matud pa muhalin kini ngadto sa P16,000.

“Patay na kuno pagkuha nila maong ila ning gidala sa daplin,” si Yosores nagkanayon.

Daling gipahibalo sa mananagat ang kapulisan ug gi-tun over gilayon kini sa Bantay Dagat nga maoy molubong sa maong isda nga gisuperbisar sa mga sakop sa Department of Environment and Natural Resources sa munisipyo. (BANAT NEWS)