Opisyal sa labor union gipatay

CEBU, Philippines -Usa ka membro sa  hunta sa usa ka  labor union sa Carmen Copper Corporation, namatay  human  pusila  sa duha  ka  wala hiilhing  kriminal  nga nagsakay  og  motorsiklo didto  sa barangay Ibo, dakbayan  sa Toledo sa miaging  Martes  sa gabii.

  Ang  biktima  nailhan nga si  Julito Moneva, 45,   nga  taga  Barangay Awihaw sa maong  dakbayan nagsakay  sa iyang  motorsiklo dihang  gipusil patay.

Si Moneva nasabak  sa  mga  bala  sa nagkalainlaing  bahin  sa lawas  ug  gideklarar  nga patay  na  sa pag-abot  niini  didto  sa  Toledo City Hospital. Ang kapolisan  nagpabilin  pa  nga  blangko tungod  kay walay  bisan  usa  ka saksi sa  maong  panghitabo.

Wala  hisayri  kun  giatangan  ba kini  o kaha  gisundan sa tawo o  mga  tawong  mipusil  kaniya. Apan usa ka  molupyo  sa duol  sa  nahitaboan  nga  si Roderick Rubin, 21, mibutyag  sa kapolisan  nga  nakadungog  siya  og  sunodsunod  nga buto  sa armas  de fuego  sa lugar  nga  nahitaboan.

Si Moneva  gikan  pa  sa trabaho sa maong higayon ug  padung  na  pauli  sa ilang  balay.

Napunitan  sa kapolisan  sa  dapit nga  nahitaboan mao  ang magazine  sa .45 kalibre  nga  pistol, unom  ka  bala niini ug pito ka kabhang  sa maong  kalibre  ug usa ka lumping  nga  bala.

Si SPO3 Praxilo Albiso, imbistigador  sa kapolisan  sa Toledo nagkanayon  nga  si Moneva  usa  ka higala  ni   William Ligutan, ang presidente sa  Carmen Copper Worker Labor Association diin  si  Moneva  usa usab ka membro.

Si Toledo City police chief, Chief Insp. Michael Anthony Bastes, nagkanayon  nga  ilang  gisundan  karon ang  labor dispute nga  maoy  duol  sa motibo sa  maong krimen.

Kini  tungod  kay  may  duha  ka labor union nga  nagkaatbang  og  nag-ilog  nga  maoy ilhon sa Carmen Copper Corporation.

Si Ligutan maoy  napili  nga presidente  sa dili  pa dugay  nga  election niining  tuiga  batok ni Toby Cuizon  sa  Panaghugpong sa Mamumuo sa Carmen Copper (PAMCC) apan  ang  grupo  ni  Cuizon misang-at  og  kaso   sa Department of Labor and Employment (DOLE) batok ni Ligutan.

Kini  human  ang  grupo  ni Cuizon  giingon  nga  mikuwestiyon sa pagkatawo  ni  Ligutan. Sa miaging  Pebrero  ning  tuiga, ang tresurero  sa  PAMCC union   nga  si Roldan Cansancio nalambigit  usab  sa kamatayon ni Rene Embralinag, usa ka ward leader ni kanhi Senador  ug sa pagkakaron mayor sa Toledo City nga  si Mayor John “Sonny” Osmeña.

Ang kapolisan  nagkanayon  nga ang motibo  sa maong  pagpamusil  mahimong nagsukad  sa maong  bangi  sa trabaho apan gisalikway kini  sa      PAMCC  kay si Embralinag wala  makatrabaho  sa maong  kompaniya  sa mina. (BANAT NEWS)