Muda-Nctu miawhag sa mga miyembro ngaatimanon ilang multa sa traffic violations

CEBU, Philippines -  Ang mga drayber ug operator nga nagbiyahe sa dakbayan sa Mandaue wala batia og kabalaka sa gihingusgan karong lakang sa City Traffic Operation Management (CITOM) nga pagpanakop sa mga drayber nga nalutsan og bench warrants sa korte tungod sa mga traffic violations.

Si Romeo Armamento nga maoy presidente sa Mandaue United Drivers and Operators Association - National Confederation of Transportworker Union (MUDA-NCTU) nga nahinabi sa Banat Manobela  kagahapon maoy mipadayag niini.

Matud pa niya nga adunay mga paagi ang dako nga bayranan sa mga PUJ drayber nga mapakunhoran pinaagi sa paghangyo niini hinungdan nga kasagaran sa mga sakop sa ilang kahugpongan ilang gidasig sa pag-atiman sa ilang obligasyon sa kalapasan sa trapiko nga ilang nahimo.

Nunot usab kini sa pagdangop na sa kadagkoan sa CITOM kang Cebu Provincial Police Director   Senior Superintendent Noel Gillamac sa pagpangayo’g tabang sa kapolisan sa lalawigan sa pagpangita sa mga drayber nga adunay bench warrants nga giingong namauli sa pinuy-anan nilang lungsod dinhi sa lalawigan.       

Giangkon niya nga dili gyud ikalimod nga adunay pipila ka mga drayber sa PUJ o taxi nga mga badlongon nga maoy hinungdan nga makadaghan usab kini madakpi sa mga traffic enforcer sa mga kalapasan nga nahimo ug giisyuhan kini og citation ticket.

Gitataw usab niya nga adunay mga drayber nga nadakpan sa mga traffic enforcers nga adunay mga drayber nga nadakpan sa nahimong kalapasan sa lagda sa trapiko nga maisip usab nila nga ang tigpatuman mao usab ang mabasol.

Naglakip na niini mao ang kakulang sa terminal nga mapahimutang unta sa strategic areas ug kun mohapit sila langawon na lamang sila sa pagpaabot apan walay pasahero nga makabayad pa sila bisan sa ilang paglabay lamang niini.

Gipasabot ni Armamento nga makaayo unta kanila ang pagpahimutang sa ilang mga sakyanan sa sulod sa terminal kay gawas nga puno na sila sa ilang pagpadagan sa gimaneho nilang PUJ makapakunhod usab kini sa gidaghanon sa mga sakyanan nga nagdagan sa kadalanan kay ang uban kanila nagpaabot man og pasahero sa sulod sa terminal.

Si Armamento miingon nga ang kakulang usab sa tukmang kasayuran sa mga pasahero hinungdan nga magpataka lang sila og atang nga dili matungod sa jeepney stop nga makatintal usab usahay sa mga drayber sa paghunong alang sa pagpasakay kay nag-apas  og pasahero nga moresulta na hinuon nga madakpan kun mataymingan nga nagbantay nga traffic enforcer.

Dugang pa niya nga sila nga mga drayber nga sakop sa ilang kahugpongan andam gayod nga makighiusa sa kagamhanan sa mga lakang nga pagahimoon nga gitumong lamang sa kaayohan dili lamang kanila nga mga drayber kun dili lakip na usab sa mga pasahero nga ilang giserbisyohan. (BANAT NEWS)