2 ka brgy sa Lapulapu mihatag na’g P10 mil sa Comelec

CEBU, Philippines - Nag-una sa paghatag sa ilang  P10,000 nga election fund  ngadto  sa Commission  on Elections (COMELEC) ang duha sa 11 ka barangay sa isla sa Olango ug 19 ka barangay sa mainland sa dakbayan sa Lapulapu.

Kini ang nasayran sa Banat News kang Atty. Ann Jannette Lamban,    election officer  sa Comelec sa maong dakbayan nga nahinabi kagahapon.

Matud pa niya nga ang duha ka barangay sa isla sa Olango nga nakatuman na sa ilang obligasyon alang sa umaabot nga barangay election sa sunod bulan mao ang barangay Cao-oy ug barangay Talima.

Dugang pa niya nga nagpakita sa ilang dakong tinguha ang tanan nga mga barangay kapitan sa dakbayan sa Lapulapu sa ilang paghatag sa ilang financial assistance ngadto sa ilang buhatan alang sa umaabot nga barangay election.

Gitataw niya nga ang kasagaran kanila nagsugod na sa pagproseso alang sa pagpagawas sa maong kantidad gikan sa kaugalingong pundo  sa  ilang panudlanan.

Si Atty. Lamban mipasabot nga dako kaayo kini og kapuslanan alang kanila sa Comelec ang maong pinansiyal nga tabang sa matag barangay nga ilang ikadugang sa ilang galastohan. Naglakip na sa ilang galastohan mao ang paghatag og honorarium sa mga magtutudlo nga moserbisyo isip board of election sa panahon na sa  piniliay.

Giangkon hinuon niya nga ang maong kantidad nga ilang madawat gikan sa kabarangayan sa dakbayan maoy ilang magamit sa pagtapak sa kakuwang sa salapi sa ilang buhatan alang  sa election karong tuiga. (BANAT NEWS)