Duha ka kanhi PNP officials sa CV na-promote nga heneral

CEBU, Philippines - Duha ka mga dagkong mga opisyal sa kapolisan dinhi sa Central Visayas ang na-promote nga mga heneral human maaprubahi sa Malacañang.

Ang bag-ohay lang nadugang sa listahan sa mga heneral sa kapolisan mao ang Bol-anong si Chief Supt. Louie Oppus ug  Chief Supt. Rodel Calungsod.

Si Oppus maoy kanhi hepe sa kapolisan sa siyudad sa Lapu-lapu ug nahimo usab nga luyo-luyong director sa Police Regional Office sa Central Visayas. Siya karon ang mamahimong director sa Firearms and Explosive Office  sa Civil Security Group didto sa Philippine National Police National Headquarters.

Samtang si Calungsod nahimong hepe sa kapolisan sa siyudad sa Talisay sa wala pa kini makalingkod isip luyo-luyo nga director sa Cebu Provincial Police Office, siya na maoy mangulo sa Communication and Electronic Service sa Camp Crame.(Chester Abadilla/EIM)

  60 ka volunteer teachers

Mikabat sa 60 ka mga Teacher Aid Volunteer (TAV) kinsa nagserbisyo diha sa mga pampublikong tunghaan sa siyudad sa Talisay ang gipangtaktak sa serbisyo tungod kay giingong sila mga “midnight appointees” sa kanhi administrasyon.

Si Talisay City Legal Officer, Alfredo Sipalay mipahibawo ngadto kang Supt. Woodrow Denuyo, Department of Education (DepEd) Talisay City Division nga ang mga TAV nga gidawat niadtong mga buwan sa Mayo ug Hunyo  dili  na padayonon sa ilang serbisyo.

“As we agreed upon, all the TAV hired in May and Jun 2013 will be terminated from jobs effective today, September 27, 2013”, matud ni Sipalay sa iyang gipadalang suwat ngadto kang Denuyo.

Si Konsehal Dennis Basillote, chairman sa committee on education natahap nga dunay kalambigitan sa politika ang pagpataktak sa nahisgutang TAV tungod kay nailhan silang mga political appointees ni kanhi Kongresista Eduardo Gullas.

Gibutyag ni Basillote nga ang maong mga TAV nangayo og tabang ngadto kanila human sila gipataktak sa ilang mga trabaho, matud pa niya biktima sila sa politika.

“Ambot lang og unsay huna-huna sa bag-ong administrasyon. Kung ako ang pangutan-on, ang pag-terminate nila kay adunay kolor sa politika,” ni Basillote pa.

Ang mga TAV maoy motabang sa mga regular nga magtutudlo panahon sa klase ug sila usab ang temporaryong motudlo sa mga bata kung ang regular nga magtutudlo mo-leave kini.

Si Basillote nagkanayon nga nagplano siya sa pag-imbitar kang Denuyo ug sa mga apektadong TAV diha sa konseho sa sunod semana lakip na sa Regional Director sa DepEd nga si Dr. Carmelita Dulangon aron maresolba  ang maong isyu.

Ang siyudad nagsweldo og P8,000 matag buwan sa usa ka TAV. (BANAT NEWS)